Balentziagari buruzko telesaila filmatzen hasi dira Donostian
Jon Garaño, Jose Mari Goenaga eta Aitor Arregi dira zuzendariak; Disney Plus plataformarentzako ekoizpen bat da, eta hurrengo urtean estreinatuko dute.
Alberto San Juan aktorea Balentziagaren larruan. Cristobal Balentziaga Getariako jostunaren (Getaria, Gipuzkoa, 1895-Javea, Espainia, 1972) bizitzari buruzko telesailaren filmatze lanak hasi dituzte jada. Donostian hasi dira lanean; atzo Igeldon eta Nautikoan izan ziren lanean. Euskal Herriko hainbat herritan ere grabatuko dute: Getarian, Irunen, Azpeitian, Hondarribian, Gasteizen, Biarritzen, Iruñean eta Balmasedan. Balentziagaren ibilbidean esanguratsuak izan diren beste leku batzuetara ere joango dira: Madrilera (Espainia), Parisera (Frantzia) eta Okzitaniako Tolosara eta Bordelera.
Alberto San Juan aktorea (Madril, Espainia, 1968) ari da Cristobal Balentziagaren pertsonaiaren papera egiten. Moriarti ekoiztetxeko Jose Mari Goenaga, Jon Garaño eta Aitor Arregi ari dira zuzendari lanetan, eta Disney Plus plataforman estreinatuko da 2023an. Udako hilabeteetan ariko dira filmatzen.
Guztira sei atal izango ditu telesailak, eta jostunaren bizitzako hainbat pasarte kontatuko dituzte: 36ko gerratik, jostunak modaren industriaren egin zituen lehen urratsetara. Gerra hasi zenean, Parisera jo zuen. Bilintx-en ilobak, Nicolas Bizkarrondok, bere bizilagunak, lagundu zion Parisen hutsetik hasten. Hura errepublikaren aldeko militante ezaguna zen, eta Parisera alde egin behar izan zuen familiarekin batera. Donostiako langileek Eisa izenarekin jarraitu zuen lanean, Askatasunaren hiribideko dendak 1968an itxi zuen arte. Gerra amaitzean, berehala ekin zioten lanari, berriz ere Bizkarrondoren laguntzari esker sortu zuen Avenue George V hiribidean, Parisen, Balentziaga etxea.
