Donostiako klimaren eta iraunkortasunaren txostena argitaratu dute
Donostiako iraunkortasunaren eta klimaren txostena aurkeztu dute gaur. (Argazkia: Cristina Enea Fundazioa) 
Cristina Enea Fundazioko Iraunkortasunaren eta Klimaren Behatokiak Donostiako Iraunkortasunari eta Klimari buruzko Urteko Txostena argitaratu du, 2021ari buruzko datuekin. Txostena klima-aldaketaren aurkako borrokaren eta egokitzapenaren ikuspegitik planteatzen da. Bere barne-egitura Donostiako Klima Aldaketaren aurkako Ekintza Planean (DSS Klima 2050) ezarritako jardun-eremuekin lotzen da. Gainera, azterlanak beste eremu erabakigarri batzuen informazioa biltzen du, hirian bizi diren, bertan lan egin edo bisitatzen duten pertsonen bizi-kalitatea eta ongizatea ebaluatzeko.
Datu nabarmenenei dagokienez, ondorengoak azpimarratu daitezke. Alde batetik, hiriko lurzoru urbanizatuak bertako azaleraren %32,22 hartu arren, azalera artifizializatuak udalerriko %43,39 hartzen du; azalera hori 2018koa baino handiagoa da, eta Zubieta auzoan kontzentratu zen gehikuntza hori. Bestalde, leku oso desberdinetan kutsatuta egon daitezkeen lurzoru identifikatuei dagokienez, haien guztizko azalerak udal azaleraren %2,4 hartzen du. 2006az geroztik eta 2019ra arte, 47 leku ikertu dira, guztira 15 hektarea hartzen dituztenak.
Biodibertsitatearen babesaren ikuspegitik, Natura 2000 sarearen bitartez babesten den udalerriko azalera nabarmentzen da; sareak, kudeaketa-planaren bidez, zaindu egiten du bere kontserbazioa, eta gaur egun azalera babestuaren %11 da, eta guztizko azaleraren %4. Udalerriko azalera babestuak 1.678,05 hektarea ditu guztira, eta guztizko azaleraren %27,53 hartzen du.
Espazio publikoaren banaketari dagokionez, bide-komunikazioko sareak azalera urbanizatuaren %28,2 inguru hartzen du gaur egun. Abiadura 30 kilometro orduko edo gutxiagora mugatuta duten bideen %88,5ean, bizikletek segurtasun handiagoz zirkulatu ahal izango dute. Bizikletentzat egokitutako bideek 83,8 km hartzen dituzte; 1.350 metro eraiki dira bizikletentzako bide segregatu berrietarako. Berdeguneek azalera urbanizatuaren %20,3 hartzen dute; 21,21 m2 biztanleko.
Guztira 210 lizentzia eman dira etxebizitzak eraikitzeko, guztiak etxebizitza libreak izateko. Lizentzia gehien eman diren guneak hauek izan dira: Ategorrieta-Ulia, Añorga eta Aiete.
Horrez gain, hiria hornitzen duen uraren kalitateak “gorena” izaten jarraitzen du: analisien %99,71k izan dituzte emaitza onak.
Mugikortasunaren esparruan, pandemia-egoeraren murrizketen eta baldintzatzaileen ondorioz, garraio publikoaren erabilera “nabarmen” jaitsi da: guztira 25.581.781 bidaia egin dira hiriaren barruan, Dbus, Lurraldebus, EuskoTren eta Renfe bidez. Urtean 136 bidaia egin dira biztanle bakoitzeko, eta 2019an 179 izan ziren.
Energiaren kontsumoari eta ekoizpenari dagokionez, kontsumo elektrikoak gora egin du zerbait (%1) 2020an izandako beherakada nabarmenaren ondoren (%5,9), eta urteko batez besteko kontsumoa 3.524 kWh da biztanleko.
