Udako zinema zikloa Donostiako bost parketan egingo dute aurten
Marisol Garmendia eta Jose M. Hernandez, Zinema parkean egitasmoaren aurkezpenean. (Argazkia: Donostiako Udala) 
Bi urteko geldialdiaren ostean, Cristina Enea Fundazioaren aire zabaleko udako zinema-zikloak bederatzigarren edizioa ospatuko du aurten. Berrikuntza nagusia da proiekzioak hiriko hainbat parketan egingo direla, Kristinaenea parkeko ohiko emanaldiaz gain. Besteak beste, Steven Spielberg, Woody Allen eta Wes Anderson zuzendarien filmak eskainiko ditu aurtengo edizioak.
Marisol Garmendia Donostiako Udaleko ekologiako zinegotziak aurkezpenean adierazi duenez, “aire zabaleko zinema-ziklo hau aukera paregabea da Donostiako gauez gozatzeko, zinemako titulu klasikoak ikusi eta udako beroari aurre egiten diogun bitartean”. Garmendiak gaineratu duenez, “aurtengo zikloak E.T. Estralurtarra (Steven Spielberg), Brian’s Life (Monty Python), El dormilón (Woody Allen) eta Fantastic Mr. Fox (Wes Anderson) hartuko ditu, adin guztietako ikusleen gozagarri izango diren filmak”.
Aurten, berrikuntza gisa, proiekzioak ez dira Kristinaenea parkera mugatuko, hiriko beste parke batzuetara ere eramango baitira. Ekologiako zinegotziak adierazi duenez, “aire zabaleko zinema eta horren inguruan sortzen den giroa hainbat auzotara eramatea da helburua, eta ez soilik Kristinaenean zentralizatzea, gero eta donostiar gehiagori ikuskizun honetaz gozatzeko aukera emanez”.
Horrela, Cristina Enea Fundazioko zuzendari Jose M. Hernandezek jakinarazi duenez, aurten “proiekzioak Araba parkean (Amara), Urumeako ibai-parkean (Txomin/Martutene), Altzako Arriaga parkean eta Bidebietako Salvador Allende parkean izango dira, Cristina Enea parkean egin ohi diren proiekzioez gain”. Hernandezek zehaztu duenez, kokapen horien hautaketak “auzoak eta bertako bizitza aldarrikatzeko beharrari erantzuten dio, normalean zirkuitu handietatik kanpo geratzen diren kokapenetan kultur jarduerak eskainiz”.
Ildo horretan, Marisol Garmendia Ekologia zinegotziak gogorarazi du Amarako Araba parkeko egokitzapen lanak egiteko “herritarren parte-hartze prozesu bat” egin zela, “herritarrek berdegune bat eskatu baitzuten kultur jarduerak egin ahal izateko, eta, hain zuzen ere, espazio horretan egingo da proiekzioa”. Cristina Enean, bestalde, proiekzioa parkearen goiko aldean egingo da, Mandasko duke-dukesenak izandako bi eraikin nagusien artean, eta ez sarrerako haur-parkearen ondoko eremuan, hainbat urtez egin bezala.
Datak, kokalekuak eta filmaren izenburua
Ekainaren 24a, ostirala, 22:30ean, Araba parkea (Amara)
E.T. Estralurtarra (euskaraz)
Ekainaren 30a, osteguna, 22:30ean, Urumeako ibai-parkea (Txomin / Martutene)
Fantástico Mr. Fox (gaztelaniaz)
Uztailaren 1a, ostirala, 22:30ean, Arriaga parkea (Altza)
La vida de Brian (gaztelaniaz)
Uztailaren 7a, 22:30ean, Kristinaenea
Lotia (euskaraz)
Uztailaren 8a, 22:30ean, Salvador Allende parkea (Bidebieta)
La vida de Brian (gaztelaniaz)
Eguraldiagatik emanaldi bat edo batzuk bertan behera geratuko balira, bi data erreserbatuko dira, uztailaren 14a eta 15a, beraien jatorrizko kokalekuetan ordu berean eman ahal izateko.
