Meteorologia ardatz duen zutabea
Jose Maria Otamendi ingeniari donostiarrak marmolezko zutabe meteorologiko bat oparitu zion Donostiari 1880an. Gipuzkoa Plazan jarri zuten, eta, gaur egun han jarraitzen du, barometroa, termometroa eta higrometroa soinean dituela, besteak beste.
Gipuzkoa plazako zutabe meteorologikoa. (Argazkia: Go Local San Sebastian webgunea) 
Gipuzkoa plazaren erdialdean bisitarien arreta erakartzen duen zutabe meteorologiko bat ageri da. Gutxi dira Donostian marmolez eginiko monumentuak, eta hiriko berezienetako bat honako hau izan daiteke.
Jose Maria Otamendi ingeniariak 1880an Donostiari emandako zutabe bat da, barometro, termometro eta higrometro batez osatua, eta lurraren esfera bat du goiko aldean, zeinaren ardatza lurraren ardatzarekiko paraleloan baitago.
Teknologia digitalaren ondorioz, gaur egun elementu horiek ez dira asko erabiltzen, eta zutabea informazio gune baten ordez, monumentu historikotzat har daiteke. Baina sakondu dezagun gehiago zutabeak dituen elementu horien inguruan. Go Local San Sebastian webgunean azaltzen denaren arabera, kiosko meteorologikoak inskripzioak ditu marmolezko zutabean zehar. Epigrafe horietan Otamendik donostiarrentzat “interesgarriak” izango zirela pentsatu zuen epigrafe batzuk ageri dira.
Presio Atmosferiko Ertaina da horietako bat. Donostiaren eta Ekuadorren arteko distantzia ere ageri da, eta baita Donostiako longitudea ere, Madril (Espainia), San Fernando (Espainia) eta Parisko (Frantzia) meridianotik neurtuta. Izan ere, garai hartan jende askok erabiltzen zituen Greenwich ez ziren beste meridiano batzuk, erreferentzia gisa.
Horrez gain, zutabe meteorologikoaren bidez, itzalpeko batez besteko tenperatura zein den jakin dezakegu, urtaroaren arabera. Eguzkiaren urteko batez besteko tenperatura maximoa zein den ere azaltzen da. Bestalde, Donostian imandutako orratzaren deklinazioa; Donostian erortzen den uraren batez besteko altuera bertikala eta Paueko (Frantzia) latitudea eta batez besteko tenperatura adierazten ditu.
