Donostiako gazte bat adarkatu dute Lodosako entzierroan
Entzierro baten artxiboko irudi bat. (Argazkia: Nafarroako Telebista) 
Lodosako (Nafarroa) jaiak ospatzen ari dira egunotan, eta astelehen iluntzean ohiko entzierroa egin zuten, zeinetan bi pertsona adarkatu zituzten. Horietako bat, lehenengo adarkatua, 20 urteko Donostiako gazte bat da, eta bi adarkadarekin eraman zuten Lizarrako ospitalera: bat ezkerreko hankan eta bestea eskuineko iztondoan.
Zezenak plazaren aurreko kalean ikusi zuen gaztea, baita buelta eman eta kolpatu ere. Gazteak aurrera jarraitzea lortu zuen, baina irristatu egin zen, eta zezenak bete-betean harrapatu zuen orduan, beheko bideoan ikus daitekeen moduan. Animalia hogei bat segundoz tematu zen gaztearekin, entzierroan parte hartzen ari ziren beste hainbat gaztek distraitzea lortu zuten arte.
Bigarren adarkatua Miguel Ventosa Venturita banderilleroa izan zen, zezen plazan bertan. Hankan hogei zentimetroko adarkada batekin eraman zuten ospitalera.
