Aste Nagusian 2019koan baino hondakin gutxiago bildu dira
(Argazkia: Donostiako Udala) Aurtengo Aste Nagusian pandemia aurretiko 2019ko Aste Nagusian baino hondakin gutxiago bildu dira. Miguel Angel Diez Hiri Mantentze Lanetako zinegotziak adierazi duenez “aurten 139.570 kilo hondakin zenbatu dira jai-esparru guztietan, 2019an baino gutxiago, orduan 171.550 kilo izan baitziren” . Hondartzetan hondakinen bilketa murriztu da ere, botiloi gutxiago egin direla antzeman baitute garbiketa zerbitzuek. Zurriolan %72 murriztu da hondakinen bilketa eta 7.040 kilo hondakin bildu dira, 2019an 25.180 kilo izan ziren. Ondarreta eta Kontxako hondartzetan berriz, 9.130 kilo zabor bildu dira, 2019an 9.090 kilo izan ziren. Udalak gogorarazi du bi egunetan jaietako jarduerak klimatologiagatik bertan behera gelditu zirela eta hori kontuan hartu behar dela. Bide-garbiketari dagokionez, guztira 116.620 kilo hondakin bildu dira eta 2019an 128.720 kilo izan ziren.
Piraten esparruan, 6.780 kilo hondakin bildu dira eta 2019an 8.560 kilo izan ziren. Guztira, 5.860 kilo egur hondar, batez ere Abordatzean erabiliak, 660 kilo plastiko eta 260 kilo frakzio hondakin bildu dira Piraten esparruan. Bestalde, Diezek nabarmendu du hiriko toki askotan pixa eta okadak garbitu dituztela eta jaiak baino egun batzuk lehenago produktu biologiko bat aplikatu zela, Portuko horman, praktika horien usainak ahal den neurrian arintzeko. Guztira, zehazki, 310 litro produktu bakterizida eta desodorizatzaile erabili dira jai-eremuak garbitzeko. Suak jaurtitzeko eremuan garbiketa indartu egin da. Bertan, baranda garbitu da, bildumak markarik ez uzteko, eta jaurtitzeko gune beroan uretan uzten diren hondakin piroteknikoak ere garbitu egin dira.
Hondakin gehien pilatu diren egunak asteburuan izan dira: abuztuaren 14ko, 20ko eta 21eko goizak. Guztira, Aste Nagusiko dispositibo berezia, txanda eta esparru desberdinetan lan egin duten 98 langilek osatu dute. Garbiketetan 8 zisterna, 14 erraztatzeko makina xurgatzaile, 2 furgoi garbitzaile, 15 ibilgailu arin eta zerbitzua ikuskatzeko 6 furgoneta erabili dituzte.
