Elkarrekin Donostiak tasa turistikoaren ekimenik eza leporatu dio Goiari
Haizea Garai zinegotzia prentsaurreko batean. (Argazkia: Elkarrekin Donostia) Elkarrekin Donostiak Eneko Goiari gogorarazi dio bi legegintzaldi daramatzala tasa turistikoaren gaiari buruz ezer ez egin gabe. Elkarrekin Donostiaren zinegotzia den Haizea Garaik adierazi du EAJ eta PSE-EE alderdiek osatzen duten gobernuak ezkerreko alderdiak uztailaren 21eko osoko bilkuran aurkeztu zuen mozioaren aurka bozkatu zuela. Mozio horrek defendatzen zuen beharrezkoa zela tasa turistiko bat ezartzea tresna fiskal gisa, donostiar guztien oinarrizko beharrei erantzuteko baliabideen bidezko birbanaketa lortzeko. Garaik adierazi duenez, “hirian tasa turistiko bat ezartzeko proposamena aurreko 2015-2019 legegintzalditik abiatzen da, eta, zehazki, aurretik dugun koalizioaren ekimena da, Irabazi Donostia taldearena -Ezker Anitza-IUk eta Equo Berdeak-. Harrezkero, behin eta berriz horretan txertatu dugu, eta Goiaren gobernuak ez duela aurrera egiteko inolako borondaterik izan ikusi dugu. Izan ere, 2019ko apirilean lortu genuen udalbatzak Eusko Jaurlaritzari eskatzea legezko tresna bat onar zezala, udalak tasa turistiko bat aplikatu eta udal-kutxetan sartu ahal izan zezan, baina 4 urte hauetan ez da ezer egin”.
Mozioa aurkeztu zenean, Garaik nabarmendu zuen turismoa murrizteko plan bat jarri behar zela abian, eta udalak turismoa sustatzeko dirua erabiltzeari utzi beharko liokeela: “Turismoak hiriko bizitzan duen eragina izugarria da, eta horren adibide argia da etxebizitzaren eta oinarrizko produktuen prezioen igoera, hondakinen sorrera handiagoa, mugikortasunaren hazkundea edo natura-ingurunearen suntsipena, turismoarekin zuzeneko lotura duten jarduerak garatzeko planifikatutako proiektuen bidez eta, ondorioz, larrialdi klimatikoko egoeran”, gogorarazi du zinegotziak. Bestalde, Elkarrekin Donostiak hirigintzaren ikuspegitik beste neurri batzuk hartu behar direla uste du, adibidez, bestelako ostatu turistikoak irekitzeko lizentzien luzapena ezartzea “hotel-plazen gehiegizko ugaritzea geldiarazteko”, eta espazio berriak kolonizatzea eta berdeguneak galtzea dakarten hirigintza-proiektuak geldiaraztea. Azkenik, Elkarrekin Donostiako zinegotziaren esanetan, “turismo-tasa bat aplikatzeko neurriez gain, epe luzerako proposamenekin bakarrik lortuko dugu norabidea aldatzea” eta gehitu du baliabide ekonomiko eta sozialak larrialdi klimatikoari eta krisi globalari aurre egiteko politiken zerbitzura jarri beharko liratekeela.
