Bi errezital antolatu dituzte Poesia Orduak egitasmoaren baitan
Maite Mutuberriak aurtengo Poesia Orduak egitasmorako egindako kartela. 
Donostia Kulturak eta Euskal Idazleen Elkarteak irailean antolatzen duten Poesia Orduak egitasmoan bi saio izango dira aurten. Hilaren 7an, Alaska (Castillo Suarez, Juantxo Zeberio eta Xabi Lozano), eta, hilaren 8an, Olatu arteko txalupa arraroa (Joseba Sarrionandia eta Ines Osinaga). Biak Victoria Eugenia Cluben izango dira, 19:00etan. Sarrera doakoa izango da, baina gonbidapenak jaso beharko dira antzokiko leihatilan, emanaldien egunetan, arratsaldeko 17:00etatik aurrera.
Alaska emanaldian Castillo Suarezek jarriko ditu hitzak, Juantxo Zeberiok musika eta Xabi Lozanok argia eta eszenografia. Alaska izeneneko bide bazterreko hotel abandonatu batean kokatutako narrazio batekin gurutzatuko dira hainbat poema eta doinu. “Maiz idatzi da desamodioaz eta abandonuaz, baina gutxiago tokiekin lotzen gaituen hari ikusezinez, tokien dolua nola egin ez dakigula. Izan ere, gure bizia, gure puskak, berriz ikusiko ez dugun jendearengan uzten ditugu, berriz egongo ez garen tokietan”, dio emanaldiaren sinopsiak. Alaska errezitala lehendabiziko aldiz eskainiko da eta bertan entzungo diren poemak beste batzuekin batera hurrengo urtean argitaratuko dira Elkar argitaletxean.
Olatu arteko txalupa arraroa emanaldiari dagokionez, duela ia hamar urte Joseba Sarrionandiak Kuban sortutako letrekin Gosariak proiektua sortu zuten idazlearen eta Gose taldearen artean. Orain, Sarrionandia Euskal Herrian dela, letra horien jatorria eta zergatia azalduko ditu Ines Osinagaren musikaz lagunduta.
