Sportjam Surf Test azokak 20.000 bisitari izan ditu asteburuan
(Argazkia: Sportjam Surf Test) 
Sportjam Surf Testek pandemiaren aurretik lortutako datu onak berretsi ditu, eta bere formatuak, hiru egunekoak, akziozko kirolen zaleak erakarri baititu berriro. Guztira, 20.000 pertsona baino gehiago igaro dira surfari, skateari, e-bikeei eta arraun surfari eskainitako gunetik.
Produktuak 1.100 aldiz baino gehiagotan probatu dituzte standetan, eta probatu dituzten pertsonen %40 emakumeak izan direla jakinarazi dute antolatzaileek. Olatuek ez dute asko lagundu asteburu honetan, baina horrek ez du surf-taulekiko interesa apaldu. Surflariek Vita Surfboards edo Polarreko artisau-tauletatik hasi, eta Trinity Boardsporteko goi teknologiarekin diseinatutakoak ere probatu dituzte, eta baita Olaian Surf, RT edo Surfsystem enpresek aurkeztu dituztenak ere, besteak beste.
Mugikortasun elektrikoak ere “arrakasta handia” izan du Voltawayk aurkeztutako proposamenei esker. “Bere diseinuzko e-bike ereduek bertaratutakoen arreta erakarri dute”, azaldu dute.
Skimboard igerilekuaren arrakasta
Arrakasta handia izan du skimboard igerilekuak ere. Kirol hau egiteko bereziki diseinatutako igerilekua da, 25 metroko luzera duena. Taulak irristatzea ahalbidetzen duen gutxieneko sakonera du, eta, asteburuan zehar, ikuskizun aipagarria eskaini du gune horrek.
