Euskarak presentzia baxua izango du Zinemaldian
(Argazkia: Pantailak Euskaraz). Donostiako Zinemaldiaren 70.atalean euskarak izango duen presentzia baxua izango da. Zinemaldiko 573 emanalditik, jatorrizko bertsioa euskaraz 5ek izango dute, eta elebidun edo eleanitzak direnak beste 11 izango dira. Bestetik, euskarazko azpidatziak izango dituzten saioak 37 izango dira, eta haurrentzako atalean 5 saio egongo dira euskarara bikoiztuta. Datu guzti hauek kontuan hartuta, emanaldien %10,1 izango da euskaraz.
Zinemaldiaren araudiaren 6.artikuluak dioenez, emanaldi guztiak gaztelaniaz edo gaztelerazko azpidatziekin ikusi behar direla ezartzen du, baina euskaraz ikusteko aukera bermatzeari buruz ez du ezer esaten. Pantailak Euskaraz, ikus-entzunezkoen mundu zabalean euskarak duen presentzia eskasa salatzen duen mugimenduak, adierazi du Zinemaldiak ez dituela euskararen erabileraren normalizaziorako legearen hainbat artikulu betetzen: “10/1982 Legeak, bere hirugarren kapituluan (Euskararen erabilera hedabideetan) dio Jaurlaritzak neurriak hartuko dituela bi hizkuntza ofizialen erabilera arian-arian berdintzeraino, eta bere 25. artikuluak dio zineman eta ikus-entzunezko grabaziotan ere bermatuko dutela”. Horregatik, irailaren 16an, ostiralean, 19:30etan, Pantailak Euskarazek elkarretaratze bat antolatu dute Kursaalaren parean, egoera salatzeko, PANTAILAK EUSKARAZ, GURE ESKUBIDEA lelopean.
Jarraian euskarak Zinemaldian izango duen presentziaren laburpena irakurri dezakezue:
- SAIL OFIZIALA: 109 emanalditik, 0 euskaraz edo euskarazko azpidatziekin.
- NEW DIRECTORS: 63 emanalditik, 12 euskarazko azpidatziekin.
- HORIZONTES LATINOS: 50 emanalditik, 2 euskarazko azpidatziekin.
- ZABALTEGI: 102 emanalditik, 16 euskarazko azpidatziekin.
- PERLAK: 82 emanalditik, 4 euskarazko azpidatziekin.
- NEST: 18 emanalditik, 2 euskaraz.
- CULINARY ZINEMA: 14 emanalditik 2 euskarazko azpidatziekin.
- MADE IN SPAIN: 31 emanalditik, 0 euskaraz edo euskarazko azpidatziekin.
- ZINEMIRA: 19 emanalditik, elebidunak/hirueledunak 8, euskaraz 2.
- HAUR ZINEMA: 5 emanalditik, 5 euskarara bikoiztuta.
- ATZERA BEGIRAKOA (Claude Sautet): 32 emanalditik, 6 euskarazko azpidatziekin.
- BELODROMOA: 6 emanalditik, 1 euskaraz.
- KLASIKOAK: 5etik 0.
- Ekitaldi bereziak, sari banaketa galak eta gainerako atalak: 37tik, 4 elebidunak.
