Antzinako autoak egongo dira ikusgai, Gipuzkoa plazan, urriaren 1ean
Auto klasikoak, Okendo plazan. (Argazkia: Kutxateka) 
Ehun bat ibilgailu zahar bilduko dira Donostian, Donostia Circuit Spirit-en V. edizioan. Ekimen hori 2017an sortu zen, Lasarteko automobil zirkuituan 1932 eta 1935 urteen artean egin ziren lasterketak gogoratzeko. Urriaren 1ean auto klasikoen proban parte hartuko duten automobilak Gipuzkoako plazan eta Elkano kalean egongo dira ikusgai, 18:00etatik aurrera.
Lehenago, Donostiatik Lasarterako bidea egingo dute, lehengo zirkuituko kaleak gurutzatuz, eta Urumea eta Bidasoa ibaien ibilguko Gipuzkoako eta Nafarroako hainbat herritatik pasako dira. Probaren irteera 10:00etan izango da.
Rallyan bi kotxe kategoria egongo dira. Batetik, 1923tik aurrera, Lasarteko zirkuituan lehen lasterketak egin zirenetik, fabrikatutako edo matrikulatutako ibilgailuak, eta, bestetik, duela 50 urte arteko ibilgailuak. Ekimenerako izena eman dutenen erdiak baino gehiago Frantziatik eta atzerriko beste herrialde batzuetatik datoz, erakundeko kideek adierazi zutenez.
