Bera Berak Elxen aurka lehiatuko da asteburuan
(Argazkia: Bera Bera) Asteburu honetan Bera Berak sentsazio onekin jarraitu nahi du, Granollersen aurka irabazi ondoren, eta larunbatean Elxen aurka jokatuko du Gascan. Imanol Alvarezen neskak laugarrenak daude ligako sailkapenean eta garaipena lortu nahi dute etxean, zalegoen laguntzarekin, lehen postuetara gerturatzeko. Aurretik Valladolid, Beti Onak eta Gran Canaria ditu, lehena puntu batera eta gainontzekoak bi puntutara, beraz, neurketa garrantzitsua da asteburu honetakoa.
Futbolean Realeko neskak Vila-realen aurka lehiatuko dira Zubietan, eta ligako debuta egingo dute, joan den asteko jaurdunaldia bertan behera gelditu zelako, epaileen arteko greba zela eta. Espainiako Futbol Federazioa eta Emakumezkoen Futboleko Liga akordio batera iritsi dira epaileen lan-baldintzak hobetzeko eta asteburu honetan hasiko da liga. Sentsazio onekin hasi nahiko dute liga Natalia Arroyoren neskek, Vila-real garaituz, datorren astean Bayern Munichen aurkako neurketa garrantzitsua dutelako Anoetan, Txapeldunen Ligako multzo fasean sartzeko.
Mutilen kasuan, Alguacilen taldeak Espanyolen aurka jokatuko du Anoetan. Atzo Omoniaren aurka irabazi ondoren, joan den asteko porrota ahaztu nahiko dute txuri-urdinek, berriro ere, sailkapeneko lehenengo postuetara hurbiltzeko. Alguacilek atzoko neurketan atsedenaldia eman zien jokalari garrantzitsu askori, beraz, ohiko hamaikakoa aterako duela espero daiteke.
PARTIDAK
Eskubaloia
Emakumezkoen ohorezko maila, 3. jardunaldia
- Bera Bera – Elx (bihar, 18:00)
Futbola
Emakumezkoen lehen maila, 2. jardunaldia
- Reala – Vila-real (bihar, 16:00)
Gizonezkoen lehen maila, 6. jardunaldia
- Reala – Espanyol (etzi, 18:30)
