(Ez)amatasunak ikuspegi feministatik aztertzeko jardunaldiak antolatu ditu Emagin elkarteak

2022/09/27

(Ez)amatasun jardunaldi feministak antolatu ditu, lehenengoz, Emagin elkarteak. Azaroaren 11n eta 12an izango dira Tabakaleran, amatasunari buruzko hausnarketa feministan sakontzeko helburuarekin.

Ainara Lasak eta Miren Arangurenek, Emagineko kideek, aurkeztu dituzte jardunaldiak Tabakaleran egin duten prentsaurrekoan. “Uste dugu amatasuna emakume guztiok gurutzatzen gaituen gai bat dela, eta ezinbestean heldu behar zitzaiola. Euskal Herriko Jardunaldi Feministetan arantza bat gelditu zitzaigun gai hau sakonki lantzeko, eta badakigu jardunaldi hauetan ezingo dugula dena jorratu, baina espazio hau horretara dator. Esperientzia desberdinak jaso nahi ditugu, gure aburuz, (ez)amatasuna deitzen diogun horretan amatasunak badirelako, ez amatasunak ere bai, eta beste amatasun batzuk baita ere”, azaldu du Lasak.

Gaia “konplexua” dela diote, amatasunaren atzean “errebeldiak, bakardadeak, epaiak, kulpak, zalantzak, esperientziak, eta beste” sortzen direlako. Emaginek “esperientzia kolektibo” gisa ulertzen du hori, eta gai “erabat politikoa” dela iritzi du. “Horregatik, ezinbestekoa da hau feminismotik lantzea”, nabarmendu du Lasak.

Jardunaldiak planteatzeko unean “sokatira” moduko bat zegoela sentitu zuten antolatzaileek. “Amatasuna, nolabait, emakume guztioi atxiki zaigun derrigorrezko destino bat da. Baina, era berean, konturatzen ari gara, eta gure elkartean halako esperientziak ere badaude, emakume askoren desio eta zoriontasun iturri bat dela amatasuna. Beraz, sokatira horretan nola kokatu asmatzea ez da lan erraza izan. Horregatik, garrantzitsua iruditu zaigu hau planteatu aurretik Emagin elkarteko kideez gain, feminista gehiagorekin hausnartzea”, zehaztu du Arangurenek.

Besteak beste, askotariko amatasun ereduak ikusarazi eta esperientziak ezagutzea izango da jardunaldi hauen funtsa. Bestalde, amatasunaren gainean sustatu diren iruditeriak aztertu eta beste “irudi konstelazioak” sortu nahi dituzte, eraldaketa ardatz izanik. Eta azken urteetan sortu diren teoria, diskurtso eta estrategia feministak ezagutzeko aukera ere izango da, gurasotasun komunitariora salto egiteko, beste senidetasun batzuk eraikitzeko eta familia heteropatriarkala arrakalatzeko.

Izen ematea azaroaren 4ra arte dago zabalik Amatasunakfeminismotik.emagin.eus webgunean, eta egun bakoitzaren truke 10 euro ordaindu beharko dituzte parte hartzaileek. “Hala ere, ez dugu nahi dirua inorentzat arazo izatea, eta norbaitek arazo ekonomikoak baditu eta etorri nahi badu, gurekin harremanetan jartzea nahikoa izango da”, zehaztu dute antolatzaileek. Gainera, gurasoek euren haurrekin joateko aukera ere izango dute, baina hori ere izen ematearekin batera adierazi beharko da.

Hona hemen jardunaldietako egitarau osoa:

AZAROAK 11 OSTIRALA
9:30	Ate irekiera
10:00	Ongi etorria. Egin, desegin, berregin.
10:30	Mahai ingurua: (Ez)amatasunak ikuspegi feministatik. Desioak, kontrolak eta denborak. Marina Sagastizabal, Anna Molas eta Diana Oliver
12:30	Atsedena
13:00	Erakusketa eta solasaldia: D’embarassos, maternages i masculinitats.
13:00	Amor de madre ikusentzunezko proiektuaren zine foruma. Maria Romero.
14:30	Atsedena
16:30	Anari
17:00	Amatasuna ez da irla bat. Nola (ez)egin ama? Bizipenak partekatzeko tartea. Bertsolariak: Uxue Alberdi eta Ane Labaka. Estolda intimo-politikoak: (ez)amen ahotsak.
20:30	Hystérie performancea. La Fêlure konpainia.

AZAROAK 12 LARUNBATA
10:00	Amatasunen arrastoak: ibilbide demografiko, historiko eta feministak. Marta Luxan, Lore Lujanbio, Josune Fernandez eta Eli Imaz. Parean Elkartea, eta June Fernandez.
12:00	Atsedena
12:30	Taldekako eztabaida: Amatasunen korapiloak askatzeko estrategia feministak.
14:00	“Nik uste dut…”. Beatriz Egizabal.
14:30		Bazkaria: guztiontzako luntxa
16:00	(Ez)amatasunen inbentario bat: Helduentzako ahozko narrazioa. Mireia Delgado.
17:00	Amatasunaren itzal literarioak. Uxue Apaolaza, Iratxe Retolaza, Danele Sarriugarte, Arantxa Urretabizkaia.
19:00	Artefaktu feministen berrirakurketa: Mursego.