21 film labur eskainiko ditu Donosskino jaialdiak urriaren 4tik 8ra
'Hotel Chevalier' film laburreko irudi bat. 
Urriaren 4tik 8ra egingo da Donosskinoren, Donostiako film laburren, seigarren jaialdia. Principe zinema aretoan egingo den inaugurazioan, Hotel Chevalier eta The Darjeeling Limited (2007) filmak proiektatuko dituzte omenaldi gisa, duela 15 urte estreinatu baitzituzten Venezian. Bost egunez iraungo duen edizioari hasiera emango diote horrela, eta nazioarteko film laburren proposamen ugari ikusi ahal izango dira.
Urriaren 5ean, 6an eta 7an, Antzoki Zaharrean, ShortZinema Saileko epaimahaiaren sariak eskuratzeko lehiatuko diren 21 film laburrak proiektatuko dira. Nazioarteko selekzio honetan, bost euskal film labur izango dira ikusgai, Etxean Shortuak saria, Euskal film labur onenaren saria, lortzen saiatuko direnak: A.P.P. (Jon Herrero), Carnivoro (Lander Castro), Hormak (Mikel Uralde Arrue), Non Grata (Alba Lozano) eta Parlez-Vous? (Aitor de Kintana).
Horiekin batera, Mulaqat bezalako istorioak proiektatuko dira, Seemab Gul zuzendariaren istorio pakistandarra, gizarte musulman kontserbadore batean Internet bidezko hitzorduen eremu korapilatsua erakusten duena. Edo, Cannesko Zinemaldian mundu mailako estreinaldia izan zuten Adrian Moyse Dullin zuzendari frantsesaren Haut les coeurs eta Marija Apcevska mazedoniarraren North Pole. Australiatik, Nash Edgertonek zuzentzen eta Rose Byrnerekin batera koprotagonizatzen duen Shark, kritikariek txalotutako Spider (2007) eta Bear (2011) film laburrek osatzen duten trilogiaren azken geltokia.
Javier Pereira aktoreak zuzendari gisa duen opera prima erakutsiko du, Suelta. Film labur horretan sumisio kimikoak garrantzi handia du. Gainera, beste film labur batzuen artean, honako hauek ere ikusi ahal izango dira: Jaime Olias aktorearen Chaval, 25 minutuko iraupena duen plano batean filmatua; Cristina eta Maria Jose Martin Barcelona ahizpen De menos, bikotearen barruko indarkeria psikologikoari eta kristalezko sabaiari buruzko gaiak planteatzen dizkigute Kira Miro eta Victor Clavijorekin; Cemento y acero Oriol Villar publizistaren opera prima, SECIMEko hainbat sarien irabazlea, eta Luis Tosar eta Daniel Guzman aktoreekin osatua; Guillermo de Olivera Sauerdogsekin western generora itzuliko da, August Diehl protagonista gisa duena, eta Hollywoodeko Wil Patton aktore beteranoak hartuko du Antzoki Zaharreko pantaila, Ian Barlingen Safe fim laburrean egindako interpretazioarekin.
ShortZinema saileko film laburrak ez dira izango Donosskinoren edizio honetan ikusi ahal izango diren bakarrak. Wes Andersonen omenaldiarekin jarraituz, jaialdiko saio bakoitza zuzendari estatubatuarraren film labur baten proiekzioarekin hasiko da. Horrela, pantaila handian ikusi ahal izango dira aurretik aipatutako Hotel Chevalier, Bottle Rocket, Castello Cavalcanti, Come Together: A Fashion Picture in Motion eta My Life. My Card.
Jaialdiaren amaiera
Sergio Arrospide aktore eta aurkezleak, beste urte batez, Donosskinoren seigarren edizioaren amaiera girotu eta gidatuko du. Urriak 8an Antzoki Zaharrean, palmaresa ezagutzera emango den ekitaldian epaimahaiko kideak izango dira, Eva Rivera, Dock of the Bay jaialdiaren zuzendaria; Asier Urbieta, zuzendari eta gidoilaria, eta Raul Lopez muntatzailea.
Era berean, ekitaldian, edizio honetako K Sariaren irabazlea ezagutaraziko da. Kresala zine-klubak bultzatuta eta Euskadiko hainbat zine-klub eta jaialdiren arteko elkarlanaren ondorioz sortutako saria da, lurralde osoan proiektu zinematografikoak ikusaraztea helburu duena.
Sorpresaz beterik egongo den gala izango da. Horren adibide da Max Zähleren Raju film laburraren proiekzioa, Donosskino Gogokoenak sailaren barruan. Kalkutan girotuta, bikote alemaniar baten gorabeherak jarraitzen ditu, adoptatutako semearen bila. Nazioarteko antzezlan honek 120 selekzio baino gehiago izan zituen mundu osoko festibaletan eta 40 sari jaso zituen, bere ibilbidea Oscar sarietarako izendapenarekin amaitu zuena.
