Tokiko merkatuen azoka egingo dute Altzan larunbatean
Harria parkean egin zuten larunbatean tokiko produktuen azoka. (Argazkia: Altzako EH Bildu) 
Ekonomia Bultzatzeko Zinegotzigoak Altzako tokiko produktuen merkatua antolatu du datorren larunbaterako, urriak 15. Hirugarren aldi honetan, tokiko ekoizleen hamahiru postu egongo dira merkatuan, eta Harria parkearen sarrerako estalkipean jarriko dituzte salgai produktuak, 09:30etik 14:00etara.
Nekazaritza-ekintzailetzako Donostia Urban Lur proiektuaren barruko jarduera da, Donostiako Sustapenak sustatuta. Proiektu hau 2021ean hasi zen, eta Donostiako herritarren artean nekazaritzako elikagaien ekintzailetza sustatzea du helburu. Horretarako, nekazaritza laborantzarako prestakuntza, lurra eta azpiegitura egokiak eskaintzen dira. Horrez gain, negozioa abian jartzeko eta produktuak online eta aurrez aurre merkaturatzeko aholkularitza ere eskaintzen da.
Harria parkean salgai jarriko diren produktuen artean, barazki organikoak, barazkiak, fruta, gozoak, ogia, kontserbak, gaztak, marmeladak, jogurtak, ahatearen produktuak, kontserbak, eztia eta beste egongo dira, Altzako, Urban Baratzako, Wilmarreko, Goxorrubiko eta Altza Baratzako (Sarea Fundazioa) nekazari-ekintzaileek zein Donostialdeko eta inguruetako tokiko ekoizleek sortutakoak; horien artean Mañeko, OnEin Kontserbak, Etxeberri Goikoa, Goenaga, Aldabazahar, Aikur, Garrarte, Amatxo Gaztandegia eta Aparola daude.
