Bideo lehiaketarekin dator Añorgako Gau Beltza
Añorgan egun mugituak izango dituzte asteburutik aurrera, larunbateko Garagardo festaz gain, astelehenerako Gau Beltza antolatu baitute. Laugarrenez antolatu dute Gau Beltza Añorgan, eta aurten, gainera, bideo lehiaketa egingo dute. Nahi duen orok bidali ditzake bideoak, baina era batera edo bestera Gau Beltzarekin zerikusia izan behar dute: mozorrotuta joan daiteke, esaterako. Hilaren 30erako bidali behar dira bideoak, anorgakogaubeltza@gmail.com helbidera, eta gero hilaren 31eko gauean proiektatuko dituzte auzoan; beheko argazkian kontsultatu ditzakezue lehiaketaren baldintza guztiak.
Horrez gain, egitarau zabala prestatu dute astelehenerako, Gau Beltzaren bueltan: 18:00etan, irekiera ekitaldia eta eskulanen, marrazkien eta beste hainbat gairen inguruko ikastaroak egingo dituzte; 19:00etan, Beldurren Ibilbidea abiatuko dute, LH5 mailatik gorako haurrentzat eta gurasorik gabe; 20:00etan, herri sorgin dantza egingo dute; 20:30ean, afaria egingo dute auzoko plazan (norberak etxean egindakoa eraman behar du); 21:30ean, bideo lehiaketako bideoen proiekzioa egingo dute.
Bestalde, Añorgako Gau Beltzaren balioekin bat egitera deitu dituzte herritarrak: “Ez mozorroak erosi, etxekoak berrerabili. Ez da Halloween, Gau Beltza mozorroak erabili. Euskaratik eta euskaraz bizi jaia. Beldurra ematea ez da soilik gizonezkoen rola; berdintasunez aritu”.
