Yomus talde ultraeskuindarreko kideak egon dira Anoetan
Valentziako Yomus talde ultraeskuindarreko pankarta, Valentziako zaleen zonan, Anoetan. (Argazkia: Sare Antifaxista) 
Sare Antifaxistak salatu duenez, igandean Realak eta Valentziak Anoetan jokatutako neurketan Valentziako Yomus talde “neonaziko” kideak egon ziren. Izan ere, partida guztian zehar, Valentziako zaleen zonan ikusgai egon ziren Old School 83 leloa zeraman pankarta handi bat eta UY83 lelodun pankarta txikiago bat –Ultra Yomus 83 esan nahi dute siglek–. Ez ziren Valentziako zaleek eraman zituzten ikur bakarrak izan, Espainiako eta Valentziako banderak ere jarri baitzituzten. Sareetan ere ikus daitezke Yomus taldeko kideak Anoetara joan zirela baieztatzen duten mezuak eta irudiak.
Old School 83 eta UY83 lelodun pankartak Valentziako ultren Yomus taldearenak dira, 1983. urtean sortu baitzen taldea. Gutxienez 1990eko hamarkadatik, hainbat talde nazirekin lotu izan dute taldea, eta nabarmena izan da beti euren izaera ultraeskuindarra; bereziki, antikatalanistak eta antisemitak dira.
Sare Antifaxistak gogorarazi du joan den astean ere “ultra neonaziak” egon zirela Anoetan, Realaren eta Betisen arteko neurketan. “Dirudienez, norbaiti interesatzen zaio estatuko ultra neonazi guztiak Anoetatik inpunitate osoz pasatzea”, salatu dute.
