Bidebietako auzo elkartea sortu dute: Bideak
Bidebietako parkea. (Argazkia: Inaxio Esnaola Aranzadi) 
Bideak Bidebieta Auzoko Bizilagunen Elkartea sortu dute Bidebietan, “auzo guztiari ahotsa emateko” helburuarekin, eta Bidebieta-La Paz bizilagun taldeak azken hamalau urteotan egindako lanaren lekukoa hartzeko. Bidebieta-La Pazen Facebookeko taldean eman dute elkarte berriaren sorreraren berri, eta elkarte ofizial gisa erregistratu direla zehaztu dute, bai Eusko Jaurlaritzan eta bai Donostiako Udalean.
“Auzo elkartea izaera apolitikoarekin eta irabazi asmorik gabe jaio da. Auzotarrek osatzen dute, eta beren auzoa defendatzeko interesa dute, beharrezkoa den tokian, eta, horrez gain, bultzada emango diote hainbat ekitaldiren eta jardueraren bidez, hainbat eremutan”, azaldu dute. Bidebieta-La Paz taldeak berak “babes osoa” adierazi dio elkarteari.
