Euskara Zerbitzuak bi sasoitan antolatuko ditu doako euskara ikastaroak langabeentzat
Hainbat ikasle, euskara ikastaro batean. (Argazkia: Donostiako Udala) 
2023ko langabeentzako euskara ikastaroak bi sasoitan banatuko ditu Donostiako Udaleko Euskara Zerbitzuak. Batetik, urtarriletik martxora, eta, bestetik, urritik abendura.
Urtarrilaren 12tik martxoaren 9ra egingo diren ikastaroetan parte hartu nahi dutenek, abenduaren 16ra bitartean eman beharko dute izena Donostiako edozein euskaltegi homologatutan eta Interneten www.donostia.eus eta www.donostiaeuskaraz.eus webguneetan. Uda pasa ondoren, urritik abendura, antolatuko da hurrengo ikastaroa.
Ikastaroetan parte hartzeko nahikoa da Donostian erroldatuta egotea, gutxienez 18 urte izatea eta langabezian egotea izena ematerakoan. Ikastaro hauek 120 ikastordu izango dituzte, eta egunero hiru ordu emango dira; astelehenetik ostiralera, goizeko 10:30etik eguerdiko 13:45era (ordu laurdeneko atsedenarekin).
Ikastaro hauen helburua da, batetik, euskalduntzea indartzea eta, bestetik, gizartean egoera okerrenean daudenei euskara ikasteko aukera erraztea. “Behar handiena dutenei erraztasunak eman behar zaizkie, baita euskara sustatzeko garaian ere. Hori dela eta, eskaintza zabaltzea erabaki dugu eta doako ikastaro horiek urtean bitan antolatuko ditugu. Langabeek, euskara ikasten badute, etorkizunean lanerako aukera gehiago izatea espero dugu”, adierazi du Jon Insausti Kultura eta Euskara zinegotziak.
