EKP-ko zuzendariak uko egin dio Eusko Jaurlaritzaren defentsari
Donostiako kaia.Inaxio Esnaola 
Euskadiko Kirol Portuak (EKP) erakundeko zuzendari Edurne Egañak Donostiako kaiko amarralekuen auziaren harira deklaratu beharko du abenduaren 12an, eta Eusko Jaurlaritzak auzi horretarako eskainitako defentsari uko egin dio. Hala azaldu du Arantxa Tapia Ekonomia Garapeneko, Ingurumeneko eta Jasangarritasuneko sailburuak, EH Bilduko Ibai Iriarte legebiltzarkidearen galdera bati idatziz erantzunda.
Horrez gain, Iriartek galdetu zuen ea Egañaren auzipetzeak Eusko Jaurlaritzaren Kode Etikoa betetzen duen. Tapiaren erantzunaren arabera, zitazio judizialaren aurrean, kasua Kargu Publikoen Kode Etikoaren Batzordeari helarazi diote, baina batzorde horrek oraindik ez du bere ebazpena argitaratu.
EKPk 2021eko apirilean ekin zion portuko 384 amarralekuak berritzeko prozesuari. Ordea, kaian plaza bat izateko izangaien taldeek salatu zuten plaza gehienak orain arte okupatzen zituzten itsasontzi berberen esku geratzen zirela, eta akats zehatzak egin zituztela, administrazio-errekurtsoak aurkezteaz gain. EKPk, orduan, eten egin zuen amarralekuen banaketa akatsak zuzentzeko, eta hiru hilabeteko epea gehitu zuen zerrendak berrikusteko. Horren ondorioz, beste zerrenda bat sortu zen.
Salaketa jarri dutenen ustez, zerrenda berriak sortzeko prozesuaren ondoriozko egintzak jatorriz kaltetuta daude eta baliogabeak dira. Salatzaileetako baten kereila onartu dute auzitegiek, eta horregatik deklaratu beharko du Egañak.
