Ibaeta Basketek ia bi hankak ditu Eurokopatik kanpo
Ibaeta Basketen eta Zabinyren arteko partidako une bat. (Argazkia: Ibaeta Basket) 
Ibaeta Basketek porrot mingarria jaso zuen ostegunean Zabiny Brnoren etxean: 79-71. Donostiarrak talde txekiarra garaitzeko gai izan ziren Gasca kiroldegiko joaneko partidan, baina ezin izan zuten garaipena errepikatu etxetik kanpo, eta horrela, Eurokopatik kanpo dituzte ia bi hankak.
Partida parekatua izan zen, eta Ibaeta Basketek irabazteko itxaropena izan zuen azken segundoetara arte, baina etxekoak gailendu ziren azkenean. Bolada txar batean murgilduta daude donostiarrak, lau neurketa jarraian galdu baitituzte ligan, eta Europan ez diote egoerari buelta eman.
Eurokopako multzoen fasean sei multzo daude, eta bakoitzeko lehenengo biak sailkatzen dira hurrengo faserako, baina baita hirugarren postuan bukatzen duten lau talderik onenak ere. Horrela, lau horietako bat izateko aukera dauka Ibaeta Basketek, baina ez da batere erraza izango. Izan ere, hasteko, asteazkenean Montpellier garaitu beharko dute Gascan, eta gainontzeko taldeen emaitzen zain egon behar dira.
