Udalak Martutene alde batera utzi izana salatu du Elkarrekin Donostiak
Martuteneko tren geltokia, Barkaiztegin. Inaxio Esnaola 
Elkarrekin Donostiak udalari eskatu dio Martutene auzoak egun dituen arazoak konpontzeko, eta Martutene Bizirik mugimenduak eskatzen dituen eskaerei erantzuteko dituen planak azaltzeko.
Aitzole Aranetak, Elkarrekin Donostiaren bozeramaileak, Donostiako auzoko elkarteek, Martutene Bizirikek kasu, “aspaldidanik” egiten dituzten erreklamazioen berri eman du, eta udal gobernua eskatzen dituzten gaiei ematen ari zaien “erantzun eskasa” salatu du. “Horien artean azpimarratzekoak dira ikastolaren inguruko bide-segurtasun eza, auzoaren garbitasun eskasa, eta Oion etxea eta gasolindegia abandonatuta egotea”, azaldu du Aranetak.
Aranetak adierazi du “gutxienekoa” dela tokiko gobernua Martutene Bizirik mugimenduarekin biltzea, “egoera bertatik bertara ezagutzeko eta haren eskaerei heltzen saiatzeko”. Koalizioaren bozeramailearen ustez, azalpenak eman behar dira auzo horretako bizilagunek bizi duten abandonu egoeraren aurrean, izan ere, urteak daramatzate beren udalak aintzat hartzen ez dituen hobekuntzak eskatzen.
Mugikortasunarekin eta segurtasunarekin zerikusia duten egoerak dira nabarmendu ditu, hala nola, hiru urte daramatzan behin-behineko biribilgunea, Dbuseko geltokietan markesinarik ez egotea, oinezkoentzako alternatibarik eza Barkaiztegi bideko trenbide-pasagunea itxi ondoren, Donostia-Astigarraga bidegorria ez lotzea, edo Hipika Bidea kalean argirik ez egotea.
Elkarrekin Donostiak auzoan esku hartzeko eskatu dio tokiko gobernuari, erreklamazio horiek konpontzeko eta Martutenen bizi diren pertsonek salatzen duten erabateko “abandonu sentsazioarekin” amaitzeko.
