Txaparreneko skate park-a Arrobitxuloko kirol eremuan kokatuko da
Herrerako Arrobitxulo parkea. (Argazkia: Zigor Etxeburua) 
Donostiako Udalak Txaparreneko kirol eremuan dagoen skate park-a kentzeko lanak hasi ditu. Instalazioa Txaparrene pasealekuaren tunelaren beste aldean dagoen Arrobitxuloko kirol eremu berrian kokatuko da.
Kiroletako zinegotzi Martin Ibabek azaldu du leku aldaketaren arrazoiak bi direla: “Lehena, instalazioa zaharkituta zegoelako, eta kirol mota honek dituen hainbat diziplina ezin zirelako praktikatu; eta bigarrena, udalaren zaraten gaineko ordenantzarekin ez zuelako betetzen, izan ere, baimendutako dezibelioak gainditzen zituen”.
Trenbidearen bestaldean dauden etxebizitzetako hainbat bizilagun kexu agertu izan dira instalazioak sortzen zituen zaratak zirela eta. Ekialdeko Barrutiak konpromisoa hartu zuen zaraten aurkako pantailak jartzeko, baina udalak berak egindako neurketek ondorioztatu zuten ez zela konponbiderik egokiena.
Horiek horrela, Ibabek honakoa esan du: “Hainbat bilera egin ditugu inguruko bizilagunekin, baita skate-a egiten duten hainbat erabiltzailerekin, eta instalazioa Ekialdeko Barrutiaren beste kokapen batetan jartzeko erabakia hartu dugu”.
Udalak hainbat kokapen aztertu du eta ikusi du onena Arrobitxuloko eremua dela. “Beraz, bertan kokatuko da instalazio moderno eta hainbat disziplina praktikatzeko balioko duena”, azaldu du udalak. Ildo beretik, hurrengo asteetan Pump track bizikletentzako zirkuitu berriaren lanak hasiko dira, egun parkearen albo batean dagoena ordezkatzeko.
Proiektua martxan
Udala skate instalazio berria Arrobitxulon kokatzeko proiektua egiten ari da. Egun, Arrobitxulon parkea, aisialdi eremua, bolatokia, petanka pista, rokodromoa, adineko pertsonentzako gimnasia-tresnak daude; inguruan hainbat kirol egiteko pista bat eta futboley zelai bat dago; eta laster Pump track eremu berria egongo da.
Udalaren arabera, aurreikusita dago aurten proiektua idaztea eta onartzea, eta 2024ean lanak egitea.
