Eneko Goia "etxebizitza duina izateko egiturazko arazoaz" ahaztu dela kritikatu dute hainbat kolektibok
(Argazkia: Jon Gartzia Albisu) 
Eneko Goia alkate eta EAJren hautagaiak ekitaldi politikoa egin zuen larunbatean, eta Donostiako Manifestua aurkeztu zuen. Horren harira, Kaleratzeak Stop, Azorako Kaltetuak eta Bentaberriko Alokairu plataformek nabarmendu dute “Donostian etxebizitza duina eta eskuragarria izateko egiturazko arazoaz” ahaztu dela alkatea. Plataformen arabera, manifestu horrek “hiri eredu positiboa, ekonomia eta inbertsioa erakartzeko gaitasuna duena, aberastasuna, kalitatezko enplegua eta bizi-proiektuak sortzen dituena” nabarmentzen ditu.
Horren aurrean, erantzun bat prestatu dute aipatutako plataformek, eta adierazi dute “onartezina” dela donostiarrek etxebizitza duin eta eskuragarria eskuratzeko aukerarik ez izatearen arazo estrukturala “ahaztea”. “Gazteek bereziki pairatzen duten arazoa da, talentudun zein talenturik gabekoak izan. Donostiatik kanpo beren bizi-proiektua planifikatzera behartzen ditu, espekulazio-prezioak ordaindu ezin dituztelako edo bizitza osorako etxebizitza partekatu nahi ez dutelako”, nabarmendu dute.
Etxegintza udal alokairuko etxebizitzetan 9.000 pertsona baino gehiago eskatzaile gisa izena emanda egotearen arazoa ez aipatzea kritikatu dute plataformek.
I+Gko enpresak Donostiara erakartzeak eskaintzen dituen aukerak aipatzen dituenean, plataformen ustez, Goia “ahaztu egiten da higiezinen espekulazioan aritzen direnak ere erakartzen dituela aipatzeaz”: adibidez, Blackstone funts putreak, Bentaberriko babes ofizialeko 520 etxebizitzen jabe nagusia 2018tik, edo Azora, Inmobiliaria Vascongadaren 320 etxebizitzak erosi zituena 2020ko urtarrilean, baita hotel-kateak ere, horietako asko nazioartekoak, finka osoak erosi dituztenak beren “negozio errentagarriak” instalatzeko. “Horiei partikularrak gehitu behar zaizkie, beren etxebizitzen bizitegi-erabilera etxebizitza turistikoengatik aldatu dutenak, udal-ordenantzaren permisibitatea aprobetxatuz; gogoratu behar dugu Euskadin daudenen %40 Donostian daudela”, adierazi dute.
Kalitatezko enplegua sortzeari dagokionez, plataformen iritziz, turismo-industrian eta horrekin lotutako zerbitzuetan egindako inbertsioen hazkundeari esker, ostalaritzako eta turismoko lanpostuek egin dute gora, “behin-behinekotasuna eta soldata txikiak dituzten lanpostuak, hain zuzen ere”.
Azkenik, “hiri eredu honetan errenta baxuak eta ertainak dituzten ehunka donostiar erbesteratzen direla”, nabarmendu dute, eta “ezin dutela beren bizi-proiektua hiri berritzaile eta talentudun honetan planifikatu, etxebizitza duin eta eskuragarria eskuratu ezin dutelako”. Azaldu dute hori ez dela beraien eta herritar askoren hiri eredua, “behin eta berriz salatu duten bezala”.
