Marisol Garmendiaren arabera, Gobernu Zibilaren eraikina Amara Berri auzoarentzat izateko "gertuago" dago
Gobernu Zibila Kultur Etxe plataformaren agerraldi bat. (Argazkia: Gobernu Zibila Kultur Etxe plataforma)Gobernu Zibila Kultur Etxe plataforma 
Donostiako PSE-EEko bozeramaile Marisol Garmendia eta Espainiako Gobernuaren Gipuzkoako ordezkari Denis Itxaso Isabel Rodriguez Espainiako Lurralde Politikako ministroarekin eta Alfredo Gonzalez Estatuko idazkariarekin bildu ziren ostiralean Madrilen, Gobernu Zibilaren eraikina Amara Berri auzoaren beharrei erantzuteko erabili dadila eskatzeko. Garmendiaren arabera, Espainiako Gobernuko ordezkariek “interesa” agertu dute eskaeraren aurrean, eta Donostiako zinegotzia “pozik eta ilusioz” agertu da. Gogoratu behar da Gobernu Zibila Kultur Etxe plataformak urteak daramatzala eskatzen eraikin horretan auzoarentzako ekipamenduak jartzeko.
“Harmena bikaina izan da, eta ministroak konpromisoa hartu du planteatutako proposamena aztertzeko, hau da, gaur egun Amarako Ordezkariordetzan lanean jarraitzen duten zerbitzu guztiak edo, gutxienez, batzuk birkokatzeko. Horrela, espazio horiek auzoko zerbitzu komunitarioetarako erabili ahal izango lirateke. Bilera gehiago egitea eta bi aldeek partekatutako helburuan aurrera egitea adostu dugu”, azaldu du Garmendiak.
Marisol Garmendia (ezkerrean), Isabel Rodriguez Espainiako Lurralde Politikako ministroarekin eta Alfredo Gonzalez Estatuko idazkariarekin, Madrilen. (Argazkia: PSE-EE Donostia)
Komisaria, NAN-aren bulegoa eta pasaporteak Alduna Enera eraman zituztenetik, Pio XII.aren plazako eraikinean atzerritartasun zerbitzuak, txertaketa-zentroa, osasun zerbitzuak eta beste zerbitzu batzuk daude. “Ministroari adierazi diogu operazio horren garrantzia, aukera bat izango litzatekeelako Gobernuaren Ordezkariordetzaren egungo espazioek beste erabilera publiko batzuk izan ditzaten Amarako herritarrentzat eta Donostiako herritar guztientzat”, gaineratu du zinegotziak, eta itxaropentsu agertu da: “Lurralde Politikako Ministerioaren eta Donostiako Udalaren arteko behin betiko akordioa lortzea espero dut, auzorako ekipamendu zibikoen eta kulturalen mapa garatuz”.
