Donostia bigarren postuan dago elitean emakumezkoen talderen bat duten estatuko 86 herrien zerrendan
Donostia Arraun Lagunakeko neskak, Galiziako uretan. (Argazkia: Concello da Coruña) 
Donostia Kirolak estatuko maila goreneko emakumeen kirolari buruz urtero egiten duen azterlanak erakutsi du Donostia “lider eztabaidaezina” dela, eta emakumeen kirolaren “erreferente gisa” duen posizioa indartzen duela, udalaren arabera.
Ikerketa hau duela hamar urtetik egiten da, hirian emakumeen kirolak duen garrantzia nabarmentzeko eta ikusgarritasun handiagoa emateko asmoz. Kirol modalitate kolektiboetan parte hartzen duten taldeak aztertu ditu (futbola, saskibaloia, eskubaloia, hockeya, boleibola, waterpoloa, errugbia, izotz-hockeya, softbola, areto-futbola, arrauna eta curlinga). Baita atletismoa eta igeriketa ere, kluben arteko lehiaketa dagoelako.
Ikerketa honen emaitzen arabera, denboraldi honetan Donostiak aztertutako hamalau kirol modalitateetatik zortzitan jarraitzen du ordezkatuta, eta guztira bederatzi emakumezko talde daude bere modalitateen maila gorenean: Bera Bera eskubaloian, Reala belar hockeyan eta futbolean, Ibaeta Basket saskibaloian, Donostiako Atletiko atletismoan, Txuri Urdin izotz hockeyan, Txuri Berri Curling eta Arraun Lagunak eta Donostiarra arraunean.
Hori dela eta, Donostia bigarren postuan dago elitean emakumezkoen talderen bat duten estatuko 86 herrien zerrendan (kopuru absolutuaren arabera), eta Bartzelonak soilik gainditzen du, hamahiru talde baititu.
Eliteko talde femeninoen kopurua herri bakoitzeko biztanleriarekiko aztertuz gero, Donostiak probintziako hiriburuen arteko lehen lekua mantentzen du –talde bateko ratioa 20.741 biztanleko–. Alde handia dago talde kopuruagatik lehenengo hiriarekin alderatuta, Bartzelonarekin, alegia –talde bat 125.861 biztanleko–. “Donostiako emakumeen kirolaren egoera on hori, batez ere, hiriko kirol klub ugariek emakumeen artean kirola sustatzeko egindako lanari zor zaio”, adierazi du udalak.
Era berean, azaldu du Donostia Kirolak kirol talde horiei laguntzen jarraituko duela, hainbat neurri hartuta; hala nola, emakumeen kirolari ikusgarritasun handiagoa emateko aintzatespen ekitaldiak eginez eta emakumeen kirolerako diru laguntza esklusiboak handituz. 2022an 250.000 euro baino gehiago bideratu zituen Donostia Kirolak horretarako.
