Loiola eta Melodiko bizilagunek dagoeneko egoiliarrentzako baimena eska dezakete
TAO gune berrien kontrola datorren maiatzaren 1ean hasiko da.
Loiolako zeharbideko aparkaleku batzuk. 
Donostiako Udalak abian jarri du Loiolako eta Aiete auzoko Melodi inguruko aparkaleku arautuen bertakoentzako baimenak eskatzeko tramitazioa. TAO gune berrien kontrola datorren maiatzaren 1ean hasiko da.
Pilar Arana Mugikortasun zinegotziak nabarmendu duenez, Loiolan erregulazio eremu berria ezartzearen helburua bizilagunen bizi kalitatea hobetzen jarraitzea da, bertakoei aparkatzeko plazak bermatuz, bai eta zenbait kaletan ibilgailuak txandakatzeko errotazio plazak ere. Melodi kalearen erregulazioari dagokionez, auzotarren eskaerari erantzun nahi dietela esan du Aranak, gaur egun inguru horretan sortzen den ertz efekturako irtenbide bat emanez, eta, bide batez, Aieteko anbulatorioaren inguruko aparkalekua hobetuz.
Datozen asteetan, eremu horietako bizilagunak erregulazio berriari eta baimenak eskatzeko prozesuari buruzko informazio guztia jasotzen hasiko dira beren etxeetan. Gainera, Loiolako auzotarrek euren zalantzak argitzeko aukera izango dute datorren hilaren 30ean, 19:00etan, Loiolako Kultur Etxean egingo den bilera informatibo batean.
5.3 sektorea
Loiola auzoa hiriko 5.3 Sektorea izatera pasako da. Sektore horrek 875 plaza izango ditu, horietatik 137 bertakoentzat bakarrik, gune hauetan: Ariztigaña kalea, Atarieder plaza, Batxillardegi taldea, Hernio Mendiko kalea, Hipika bidea, Matxiñene, Urbasa Mendilerroa, Urbia eta Zubiondo bideak. Errotazio mistoko 667 plaza (bertakoek ere aparkatu ahal izango dute) eta errotazio hutseko 16 plaza (15`) ere egongo dira. Plaza horietan dagokion tiketa ordaindu beharko da.
Plaza gehienek 180 minutuko aparkaldia izango dute gehienez (gune berdea), Aralar Mendilerrokoek izan ezik, 90 minutuko gehieneko denbora izango baitute (gune gorri eta komertziala), eta saihesbideko taulen azpiko aparkalekukoek gehienez 540 minutuko iraupena izango dute. Plaza horiez gain, mugikortasun murriztua duten pertsonentzat legez ezarritako plazak, motorrentzako plazak eta zamalanetarako plazak egongo dira.
Melodi kalea
Aieteko Melodi kalearen inguruko hainbat bide arautu ditu udalak. Horrela, Lazkano pasealekua eta Jose Olaizola kalea San Roke 1.4 aparkalekuen sektorean sartuko dira, eta 87 plaza berri gehituko zaizkio; Melodi kalea eta Sanserreka eta Pio Baroja pasealekuak, berriz, 4.1 Antigua sektorean sartuko dira. Melodi kaleak 77 plaza izango ditu bertakoentzat eta Sanserreka Pasealekuak 14; Pio Barojak, berriz, 19. Era berean, bertakoentzako 37 plaza berri arautzeko aprobetxatu da Aizkorri eta Manuel V. Montalban kaleetan.
Ez da txartelik erabili beharko
Aldaketa horiek egiteko ordenantza aldatu zenetik, txartel fisikoa baztertu egin da, baimendutako bertakoen ibilgailuen identifikazio gisa, aparkalekua kontrolatzeko sistema berriek baieztapenak telematikoki egiteko aukera ematen baitute.
Aldaketa horrek ez dio Loiolako sektore berriari bakarrik eragiten, hiri osoari aplikatuko baitzaio. Beraz, une honetatik aurrera ez da bereizgarririk beharko, eta, horrela, eskaera berrietarako eta hemendik aurrera egiten diren bajetarako izapideak arinduko dira, ez baita beharrezkoa izango txartela jasotzea edo itzultzea.
Horrela, aparkatzeko baimena egiaztatzen duten txartelak emateari utziko zaio eta, horren ordez, baimena eman dela jakinaraziko zaio herritarrari. Gainera, ez da beharrezkoa izango haizetakoari itsatsita mantentzea TAO ordenantzaren azken aldaketa indarrean jarri aurretik emandako txartelak.
Baimen eskaera
Herritarrei zerbitzu hobea eskaintzeko administrazioa digitalizatzeko bidean, Udalak bertakoen baimen eskaerak kudeatzeko sistema telematikoa bultzatu nahi du. Hori dela eta, herritarrei gomendatzen zaie http://www.donostia.eus/tramiteak webgunearen bidez izapidetzea (beharrezkoa izango da BakQ ziurtagiri elektronikoa, Udalinfoko bulegoetan eska daitekeena), baina presentzialki ere egin ahal izango da eskaera, aldez aurretik hitzordua eskatuta, hiriko Udalinfoko edozein bulegotan (Easo, Arroka, Morlans edo Altza).
