Herritarrek udaletxea ezagutu ahal izango dute bisita gidatuen bidez
Donostiako udal batzar aretoa. 
Donostiako Udalak ate irekien jardunaldiak antolatuko ditu apirilaren 14, 15 eta 16an, herritarrek udaletxea barrutik ezagutu dezaten.
Donostiarrek modu librean bisitatu ahal izango dituzte udaletxeko bulego nagusietako batzuk, eta, aldi berean, doako bisita gidatuetan parte hartu ahal izango dute. Bisitariek gelak ikusteko aukera izango dute, hala nola, udalbatza aretoa, eskalinata nagusia, harrera gela, gobernu batzordearen aretoa eta prentsa aretoa.
Eraikina bisitatzeko sarrera Alderdi Ederreko erdiko eskaileretatik egingo da, eta ordutegia honako hau da: apirilaren 14ean 16:00etatik 20:00etara, eta apirilaren 15ean eta 16an 11:30etik 14:00etara eta 16:00etatik 20:00etara.
Bisita gidatuak
Gidari batekin ate irekien jardunaldian parte hartu nahi duten herritarrek edo bisitariek apirilaren 12ra arte eman dezakete izena 010 telefonoan, edo presentzialki, Udalinfoko bulegoetan. Taldeek gehienez 25 pertsona izango dituzte.
Udalaren historia azalduko duten bisita gidatuetarako aurreikusitako ordutegiak honako hauek dira: Apirilaren 14an, 16:00etan euskaraz eta 17:00etan gaztelaniaz; eta apirilaren 15ean eta 16an, 11:30ean euskaraz, 12:30ean gaztelaniaz, 16:00etan euskaraz eta 17:00etan gaztelaniaz.
