Lurraldebusek zerbitzu berri bat eskainiko du Donostia eta Irun zuzenean lotzeko
Lurraldebuseko autobus bat Gipuzkoa Plazan.Irutxuloko Hitza 
Lurraldebusen Bidasoa-Oarsoaldeko emakida berritzeko aurreikusitako berrikuntzak aurkeztu dituzte Mugikortasuneko eta Lurralde Antolaketako diputatuak, Rafaela Romerok, eta Mugikortasuneko foru zuzendariak, Ander Iturrik. Hurrengo hamar urteetarako 130 milioi euroko aurrekontua du emakida horrek.
Emakidak berrikuntza “garrantzitsuak” dituela azaldu dute, eta 346.000 biztanle dituzten zortzi udalerriri ematen die zerbitzua. Udalerri horiek Gipuzkoako biztanleriaren erdia hartzen dute gutxi gorabehera. Era berean, erabiltzaileen kopuruari dagokionez, bigarren emakida da Gipuzkoan, 2022an zortzi milioi bidaia baino gehiagorekin, eta lurraldeko biztanle gehien dituzten hiru hiriak lotzen ditu: Donostia, Irun eta Errenteria.
Berrikuntza nagusiak
Berrikuntzei dagokionez, alde batetik, zuzeneko zerbitzu berri bat jarriko dute autobidetik Irun eta Donostia (BI01) artean, Intxaurrondotik eta Grosetik erdiguneraino sarrera duena. “Horrela, bikoiztu egiten da Bidasoa Beherearen eta Donostiaren arteko lotura zuzena, BI01 lineak bat egiten baitu Hondarribia eta Donostia arteko (BI02) autobide zuzenarekin”, azaldu dute.
Bestetik, Amara-Miramongo konexio berriak egingo dituzte, Bidasoako (Irun eta Hondarribia) eta Oarsoaldeko (Errenteria-Oiartzun-Lezo eta Pasaia) zerbitzuak handitzen dituztenak, eta Amararaino, ospitaleetara, Onkologikora eta Miramongo parke teknologikora iritsiko direnak. Horrela, herri horietako Lurraldebusen erabiltzaileek osasun-zentro horietara garraio publikoan joateko aukera izango dute, baita osasun langileak ere, eta Lurraldebusekin konektatuko dira bi eskualdeetatik Amara-Miramongo lantokietara.
Konexio berri bat ere jarriko dute OR6tik (lehen E6), Errenteria Astigarragarekin lotzen duena, Altzatik eta Garberatik igaroz. Zerbitzu hori apirilaren 11n jarriko da martxan. Era berean, zazpi minutuero Errenteria Pasai Antxorekin eta Donostiarekin lotzen duten zerbitzuak jarriko dituzte, eta zerbitzuak hamabost minutuero Oiartzundik eta Donibanetik.
Horrez gain, Hondarribitik Antiguara eta unibertsitateetara doazen konexioen zerbitzuak hobetuko dituzte. Zerbitzu horiek ez dira eskola aldietara mugatuko, eta konexio horretan urte osorako zerbitzuak zabalduko ditu.
