Villa Belengo harresia eraitsi dutela salatu du Ancorak
Villa Belengo harresia, eraitsita. (Argazkia: Ancora) 
Ordu gutxitan hondeamakinek Villa Belengo horma ia erabat suntsitu dutela salatu du Ancorak. 1883koa da, eta Matias de Arteaga obra maisuak egin zuen. Harresia hiriko leku askotatik ikus zitekeen, “bere tamaina eta nagusitasunezko posizioagatik”, Kontxako badiaren aurrean.
Harresiak hamabost metroko altuera eta 50 metroko luzera zuen, gutxi gorabehera. Lodiera handia zuen, eta tarte erregularretan jarritako kontrahormak behar zituen bertikaltasunari eusteko. Arrosa koloreko kareharrizko harlangaitzez egina zegoen, itsasertzeko flyscharen harri bereizgarria. “Defentsa eraikuntza bat zirudien, finka partikular baten itxitura baino gehiago. Izan ere, duela hamarkada batzuk arte erremate almenadun apaingarri bat zuen, bere itxura militarra areagotzen zuena. Baina ez da gerra karlisten gotorleku bat, haren jatorria askoz prosaikoagoa delako”, azaldu du Ancorak.
Horma horren sustatzaileak Valmedianoko markesak izan ziren, eta Siro Alkain bizilagunaren aurrean haien intimitatea zaintzeko asmos agindu zuten harresiaren eraikuntza. “Alkainek Altxueneako begiratoki bat zuen bere jabetzan, eta behin eta berriz agertzen zen hara ikuspegiez gozatzeko. Valmediarrek beren etxeko horma handitzea erabaki zuten, bizilaguna kuxkuxean ibil ez zedin. Andres Avelino de Arteaga markesa, Husar de Paviako koronelak Goierriko (Lazkaoko Jaurerria) jauregi garrantzitsuak zituen. Bere emaztea Belen Etxague andrea zen, edertasun handiko donostiarra, hiribilduari izena eman ziona. Hemen jaio zen bere semea, Joakin: Infantadoko Dukea izango zena, enpresaria, mezenas eta Zumaiako Gorteetarako diputatua”, adierazi du Ancorak.
Harresi hori suntsituta, “erreferente bat” desagertu dela deitoratu du Ancorak. Ingeniaritzako obra “oso estimagarria” zen, azaldu du. Alcainbideko bidea ezkutatzen zuen, Altxueneako jabeak ordaindutako auzo bide zaharra. “Azokara jaisten zirenean, baserrietako ibilbiderik gogokoena izan zen, harrizko hormaren atzean Kantauriko eguzki eta ekaitzen aurrean babesa aurkitzen zutelako. Horma donostiarren hainbat belaunaldiren paisaia sentimentalaren parte da, bereziki Marianistetan, Villa Belengo Ikastetxean edo ISSAko Idazkaritza Eskolan ikasketak egin zituztenena”, nabarmendu du.
2017an Ancorak Hiribilduen Inbentarioa egin zuen Hirigintza Sailaren aginduz, Aldapeta 25 lursaila bere harresiarekin eta lorategiko arroka haitzuloarekin barne. “HEOBPBren berrikuspenean babes eskaera bera errepikatu zen, baina udalak lurzati hori birkalifikatu du, 38 etxebizitza eta dagozkien garajeak eraiki ahal izateko”, azaldu du Ancorak.
