"Auzoekin konpromisoa duten" pertsonek osatutako zerrenda aurkeztu du Elkarrekin Podemosek
Basque Culinary Centerrek Okendo Alde eremuan jarri nahi duen eraikinari eta San Bartolomeko proiektuari buruzko parte hartze prozesua abiatuko du koalizioak.
Manteo inguruan aurkeztu du hauteskunde zerrenda Elkarrekin Podemosek. Argazkian, ezker-eskuin: Jon Tamayo (independentea, zerrendako hirugarrena), Arantza Gonzalez (Ezker Anitza-IU, bigarrena), Victor Lasa (Ahal Dugu, alkategaia) eta Lidia Ucher (Equo, laugarrena). (Argazkia: Beñat Parra) 
Elkarrekin Podemoseko alkategai Victor Lasak maiatzaren 28ko udal hauteskundeetarako prestatu duen hautagaien zerrenda aurkeztu du astearte goizean, Manteo inguruan. Ahal Dugu, Ezker Anitza-IU, Equo Berdeak eta Alianza Verde alderdiek koalizioan osatutako hautagaitza da Lasarena, eta hautagai independenteak ere badaude zerrendan. Aurkezpenean zerrendako lehenengo lau hautagaiak egon dira: Lasa bera, Arantza Gonzalez Ezker Anitza-IUko Gipuzkoako koordinatzailea, Jon Tamayo Bidebietako Bideak auzo elkarteko presidentea (independentea) eta Equoko Lidia Ucher, Gizarte Ekintzako Hirugarren Sektorearen eremuko komunikazioan eta aktibismoan eskarmentua duena. Azken inkesten arabera, bi zinegotzi lortuko ditu Elkarrekin Podemosek maiatzeko udal hauteskundeetan.
Aurkezpena egiteko lekua ez dute ausaz aukeratu, Lasak azaldu duenez: “Oso leku berezia da denontzat, baina bereziki Gros-Ulia-Manteo eremuko herritarrentzat, eta baita niretzat pertsonalki ere, inguru honetan jaio bainintzen”. Ordea, gunea “erabat aldatuko” dela salatu du alkategaiak, Basque Culinary Centerrek han eraiki nahi duen egoitza berria dela eta: “Leku oso garrantzitsua da, erabat aldatuko baita, nahiz eta herritarren gehiengoak errefusatu. Hain zuzen ere, herritarren iritzia erabakien erdigunean jartzea da jende independenteak osatutako hautagaitzak lortu nahi duen helburu nagusietako bat”. Halaber, iragarri du parte hartze prozesu bat abiatuko dutela laster, donostiarrek bi proiekturen inguruan euren iritzia eman dezaten: San Bartolome muinoko proiektuaren inguruan eta Basque Culinary Centerrenaren inguruan.
Bestalde, “hiriaren etorkizuna eraikitzeko”, gauzak “modu desberdin batean” egin nahi dituztela nabarmendu du Lasak, “egungo udal gobernuarekin alderatuta, alderantziz”: “Hautagaitza honek auzoen errealitatea ezagutzen du, oso konprometitua dago, eta herritarren arazoak konpontzen laguntzeko borondate argia du. Herritarrek erabaki prozesuetan zuzenean parte hartzea nahi dugu, modu sendoan. Hori era guztietako elkarteekin lan eginez egiten da, benetako ahotsa eta parte hartzea emanez. Eta, zer hobeto haiei ahotsa emateko, gure hauteskunde zerrendetan sartzea baino”.
Alkategaiak gaineratu duenez, “Osakidetzaren eta eskola publikoaren alde anbiguotasunik gabe apustu egiten duen proiektu politiko bakarra” da berea, “Euskadiko boto berdea ordezkatzen duen bakarra; elite jakin batzuen interes partikularrak gure herri eta hirien eta bertako jendearen benetako premien aurretik jartzen ez dituen bakarra. Proiektu plurala, soziala, feminista eta berdea”. Ildo beretik jo du zerrendako bigarrenak, Arantza Gonzalezek: “Albiste oso ona da Donostian hautagaitza plural aurrerakoi, ezkertiar, feminista eta ekologista bakarra egotea”. Eta, gaineratu du Elkarrekin Podemos dela “Erabat EAJren mende dagoen alderdi sozialista horren aurrean, alternatiba bakarra”.
Gonzalezek nabarmendu du “argi” daukatela “gertukoa zaindu behar dela, behar dugunean babesten gaituelako”: “Gure bizitza osoan zaintzak behar ditugu, haurtzarotik zahartzaroraino. Zaintza horiek ezinbestekoak dira bizitzarako, eta zerbitzu publikoek bermatu behar dituzte”. “Hiriaren eta bere auzoen errealitatea, arazoak, aurre egin beharreko erronkak eta aurre egiteko aukerak ezagutzen ditugun pertsonak gara; eta hiria herritarren zerbitzura dagoela ikusita egiten dugu, eta ez elite ekonomikoen edo putre funtsen zerbitzura; azken batean, batasunetik eta donostiarren zerbitzura egonda”, gaineratu du.
Auzoak eta espazio berdeak
Hirugarren eta laugarren postuetako hautagaiek ere hartu dute hitza; auzoen arteko arrakala txikitu behar dela nabarmendu du Tamayok, eta espazio berdeak ezinbestekoak direla aldarrikatu du Ucherrek.
“Politikariak herritarrak entzuteko elkartzea oso handia da, eta ez dut orain arte ikusi. Auzoko asoziazionismotik nator, eta hiriko auzoen arteko bizi kalitatearen arrakala, txikitu beharrean, handitzen ari dela ikusten dut, legegintzaldiek aurrera egin ahala. Herritarrei entzun behar zaie, baina herritar guztiei, eta ez horietako batzuei soilik. Denek behar dute udalaren laguntza”, adierazi du Tamayok.
Ucherrek, aldiz, nabarmendu du “benetan axola duena babesteko” dagoela zerrendan: “Osasuna, ongizatea, kultura eta biodibertsitatea. Izan ere, oparotasuna aire garbia arnastea da, gauetan atseden hartzeko isiltasuna izatea edo oinez joan ahal izatea erostera, ikastera, lanera, medikuarengana edo liburutegira”. Eta, hori guztia Donostian gutxitzen ari dela salatu du: “Gero eta auto gehiago eta parke gutxiago daude”.
- Victor Lasa Briz (Ahal Dugu)
- Arantza Gonzalez Garcia (Ezker Anitza-IU)
- Jon Tamayo Insua (independentea)
- Lidia Muñoz Ucher (Equo)
- Karen Ortiz De Guinea Garcia (independentea)
- Carlos Rodriguez Ameztoy (Ahal Dugu)
- Enrique Sanchez Blazquez (Ahal Dugu)
- Hugo Martin Santos (Ezker Anitza-IU)
- Maria Nieves Solanas Echepare (Ahal Dugu)
- Luis Astrain Anso (Ahal Dugu)
- Gonzalo Garcia Chasco (Ahal Dugu)
- Milagros Larburu Aguirre (Ezker Anitza-IU)
- Ainara Diego Ruiz (Ahal Dugu)
- Irene Coulon Pierruges (Ahal Dugu)
- Maria Pilar Garrido Gutierrez (Ahal Dugu)
- Ibon Lopez Martin (Ahal Dugu)
- Javier Ezquerecocha Pajares (Ahal Dugu)
- Marta Huarte Paño (Ahal Dugu)
- Miguel Angel De La Calle Villagran (Ahal Dugu)
- Maier King Lara (Ahal Dugu)
- Maria Rosario Rabano Zaldivar (Ahal Dugu)
- Jorge Arandia Del Coto (Ahal Dugu)
- Nuria Saldaña Tussel (Ahal Dugu)
- Iñigo Oliveros Bruneton (Ahal Dugu)
- Marta Ezquerecocha Diez (Ahal Dugu)
- Juantxo Dominguez Lopez (Ahal Dugu)
- Joaquin Gomez Lima(Ahal Dugu)
- Jose Eugenio Rojo Pol (Ahal Dugu)
