San Bartolomeko proiektuaren kontrako helegitea onartu du epaitegi batek
San Bartolome Muinoa eremuan lur azpiko aparkaleku bat jarriko dute. 
EAEko Auzitegi Nagusiko Administrazioarekiko Auzietako 2 zenbakiko Epaitegiak onartu egin du San Bartolomeko Plan Bereziaren aurkako errekurtsoa. Plan horren arabera, muinoaren iparraldeko hegalean 8.000 metro koadroko merkataritza gune bat sortuko da, eta azpian lau solairuko aparkalekua egingo dute.
Joan den astean, Dendartean eta Ba Gera! merkataritza elkarteek eta Erdian Bizik, Donostia Defendatuzek eta Amara Baik Donostiako Udalak onartutako Plan Berezia auzitegietara eramateko asmoa agertu zuten. EAJ eta PSE-EEren botoekin onartu zen plana eta oposizioaren, PPren, Elkarrekin Donostiaren eta EH Bilduren ezezkoarekin.
Kritika nagusiak trafikoaren pilaketa eta saltoki txikiei lehia eragitea dira. Elkarteek jarritako helegitearen harira, epaitegiek arrazoia emateko itxaropena agertu dute, Donostiako Udalak San Bartolome inguruari buruzko mugikortasun-azterketarik egin behar ez izateko arauak urratu dituelako, proiektua baimentzeko Plan Bereziaren izapidetzearen barruan.
Helegitearen arabera, Udalak ere ez du Plan Bereziaren Ingurumen Txosten Estrategikorik egin ustezko arkeologia aztertzeko, eta, elkarteek diotenez, ez du aintzat hartu 200 plaza arteko aparkaleku bat irekitzearen ondorioz airearen kalitateak izango duen okertzea.
Edonola ere, helegitea ez da oztopoa obrak hasteko, proiektu guztiak prest baleude; izan ere, lanak kautelaz eteteko eskaerak milioi askoko fidantza ekarriko luke, eta ezingo lukete bere gain hartu.
