Udako kirol ikastaroetan izena emateko epea maiatzaren 8an irekiko da
Paco Yoldi kiroldegiko gimnasioa. (Argazkia: Inaxio Esnaola) 
Donostia Kirolak udako kirol jardueren kanpaina aurkeztu du. Ikastaroen eskaintza zabala da, eta kanpaina honetan parte hartzen duten hiriko 33 kirol entitateek prestatu dute. Ikastaroak ekainaren 19an hasi eta irailaren 10ean amaituko dira. Izena emateko epea, berriz, maiatzaren 8an irekiko dute.
Eskaintza bi talde handitan banatuta dago: batetik, 16 urte bitarteko ikasleei zuzendutako jarduerak, eta, bestetik, gazteei eta helduei zuzendutakoak. Kanpaina honetan gehien eskatzen diren jarduerak kirol anitzekoak, surfa, igeriketa, tenisa eta piraguismoa izaten dira. Nabarmentzekoa da itsasoarekin lotutako jardueren eskaria gero eta handiagoa dela: surfa, bodyboarda, SUP, etab. Jarduera horiek eskaintza osoaren heren bat baino gehiago dira.
Udako kanpainak 60 jarduera baino gehiagoren artean hautatzeko aukera emango du: arrauna, arku-tiroa, urpekaritza, bela, mendiko bizikleta, eskalada, skatea, esgrima, hipika eta padela, besteak beste.
Inskripzio sistema
Azken urteetako inskripzio sistemari eutsiko diote, bi faserekin. Lehenengoa, maiatzaren 8tik 11ra bitartean (biak barne) egingo den aurretiko izena emateko fasea da. Fase honetan pertsona bakoitzak ikastaro berean aurretiko izena emate bat onartuko da, baina pertsona berak lau ikasturtetan eman ahal izango du izena. Taldeko aurreinskripzioak ere egin ahal izango dira, eta gehienez lau pertsona onartuko dira ikastaro bakoitzerako. Taldeko aurreinskripzio horiek zenbaki bakar batekin hartuko dute parte zozketan, eta emaitza bera izango dute taldekide guztiek.
Aurreinskripzio horiek donostiakirola.eus webgunearen bidez egitea gomendatzen da, baina aurrez aurre ere egin ahal izango dira zerbitzu hori ezarri duten erakundeetan. Egindako aurreinskripzio guztiek parte hartuko dute maiatzaren 12an egingo den zozketan, eta astebeteko epea izango dute ordainketa egin eta izen ematea berresteko.
Bigarren fasea maiatzaren 29an hasiko da, eta hortik aurrera zuzenean eman ahal izango da izena plaza libreak dituzten ikastaroetan. Zuzeneko izen emate hori online ere egin ahal izango da donostiakirola.eus webgunearen bidez, edo aurrez aurre klub eta erakunde antolatzaile bakoitzaren bulegoetan.
