PPk gazteentzako etxebizitzak eraiki nahi ditu Illunben
Illunberen kudeaketa domino baten modukoa izan dela salatu du Borja Corominas PPren alkategaiak. (Argazkia: PP) 
PPren alkategaia Illunben egon da astelehen goizean, haren hitzetan, Illunbekoa baita “udal kudeaketaren orrialde beltzenetako bat”: “Udalak ez du euro bakar bat kobratu eragiketagatik. Inork ez daki zer egin den eta zer ez, hori da tristeena”.
Corominasek gogorarazi du azken urteotan gazte ugari Donostiatik kanpo joan direla bizitzera, eta hori “onartezina” dela nabarmendu du: “Denontzako hiri bat eraiki behar dugu. Horregatik aukeratu dugu Illunbe gazteentzako etxebizitzak eraikitzeko proiektu bat aurkezteko, Miramongo parke teknologikoa handitu nahi dugun proiektu bat. Gazteak eta enpresak elkarrekin biziko diren ingurunea eraikitzea, Donostian lan egin eta bizi ahal izateko. XXI. mendeko Donostiaren eraikuntzak Illunberen inguruan biratzea nahi dugu”.
Horretarako, “inbertsioa erakartzeko lobby bat sortzea” proposatu du Corominasek. Halaber, Hiri Antolamendurako Plan Orokorra aldatzearen alde egin du, Illunben “gazteentzako etxebizitzak garatzeko, irisgarritasunaren eta ingurunearen hobekuntzaren izapideak arintzeko”. Horretarako, PP udal gobernuan egon behar dela dio alkategaiak.
Horrez gain, Corominasek gogorarazi du Illunbeko sarbideak egiteke daudela, eta horrek lau milioi euroko inbertsioa suposatuko duela. Bestalde, zezen plaza mantentzearen alde agertu da, han egiten dituzten jarduerak Atano III.aren frontoiaren inguruko erabilerako anitzeko pabiloi batera lekualdatuz.
‘CheckpointGoia’
Mugikortasuna da PPk azken legealdian fokua gehien jarri duen gaietako bat, eta, hain zuzen ere, horren inguruko ekitaldia egin zuten larunbatean Erdialdean. Hain zuzen ere, CheckpointGoia deitu zioten eremu bat jarri zuten Bilbo plazatik gertu.
Europatik datozen irizpideek kontrakoa badiote ere, Corominas eta bere alderdia erdiguneko zirkulazioa mugatzearen aurka agertu da beti. Hain zuzen ere, larunbatean esan zuen alkate izanez gero, berak ez duela erdiguneko zirkulazioa itxiko; popularraren ustez, Eneko Goiaren udal gobernuak hori egingo du hauteskundeak pasatzen direnean, nahiz eta udal gobernuak ez duen halakorik esan.
Corominasek esan zuenez, azken hilabeteotan udal gobernuak hartutako “neurri guztiak kaotikoak dira”. Horrela, mugikortasunaren arloko “eragile guztiekin” hitz egin behar dela nabarmendu zuen.
Udal gobernuak mugikortasun arloan hartutako neurriak salatzeko, ‘CheckpointGoia’ jarri zuten PPkoek larunbatean Erdialdean. (Argazkia: PP)
