Realak Europan jokatuko du, laugarrenez jarraian
David Silva, Gironaren aurkako partidako jokaldi batean. (Argazkia: Reala) 
Realeko mutilek ez zuen jakin bi goleko abantaila aprobetxatzen larunbatean, eta puntu bakarra gehituta amaitu zuen Gironaren aurkako partida. Zapore gazi-gozoarekin atera ziren zale txuri-urdinak estadiotik, baina errealitatea hor dago: Realak historia egiten jarraitzen du, puntu horrekin, hurrengo denboraldian Europan jokatuko baitu, laugarren denboraldiz jarraian. Historikoa da lorpena, soilik Realak irabazi dituen bi liga bakarrak irabazi zituen belaunaldiak lortu baitzuen halakorik, 1978tik 1982ra. Ikusteke dago orain zein txapelketa jokatuko duten txuri-urdinek, Txapeldunen Liga ala Europa Liga; gelditzen diren partidetan erabakiko da hori. Gironaren aurkako neurketan, Oiartzabalek (bosgarren minutuan, penaltiz) eta Silvak (24. minutuan) sartu zituzten txuri-urdinen golak, eta Coutok (37. minutuan) eta Stuanik (lehenengo zatiko luzapenean) talde katalanarenak.
Neskei dagokienez, hiru puntu gehitzeko aukera paregabea galdu zuen Natalia Arroyoren taldeak, 1-0 galdu baitzuen Levante Las Planasen etxean. Reala zen partida irabazteko faboritoa, seigarren sailkatu gisa iritsi baitzen valentziarren etxera, eta Levante Las Planas hamabigarren gisa. Orain, ordea, zazpigarrena da Reala eta hamaikagarrena Levante Las Planas.
Eskubaloian, Bera Bera liga irabazteko kanporaketan murgilduta dago, eta emaitza txar batekin itzuli da Elxetik. Izan ere, gol bakarrarengatik (28-27) galdu zuten donostiarrek Elxen etxean, finalerdietako lehenengo partidan. Horrela, ostiralean jokatuko dute itzulerakoa, etxean, eta euren maila erakutsi beharko dute Elxi irabazi eta finalerako txartela lortu ahal izateko.
Belar hockeyan, intentsitate handiko neurketa jokatu zuen Realak etxean Egararen aurka, baina bisitariek lortu zuten garaipena, azken minutuetan. Marta Grauk sartu zuen garaipenaren gola, penalti stroke baten bidez. Horrela, ligako zazpigarren sailkatuak dira orain txuri-urdinak.
EMAITZAK
Futbola
Gizonezkoen liga, 34. jardunaldia
- Reala 2 – Girona 2
Emakumezkoen liga, 29. jardunaldia
- Levante Las Planas 1 – Reala 0
Eskubaloia
Ligako kanporaketa, finalerdiak
- Elx 28 – Bera Bera 27
Belar hockeya
Emakumezkoen ohorezko maila, 19. jardunaldia
- Reala 0 – Egara 1
