Kartzelan sartuko dute Lukas Agirreren hilketagatik atxilotu zuten bigarren gizona
Usandizaga ikastetxeko ikaskide ohiek Lukas Agirreri omenaldia egin zioten.Xalba Ramirez 
Joan den Eguberri egunean Donostian labankadaz hil zuten Lukas Agirre gaztearen heriotza ikertzen ari den epaileak kartzelan sartzeko agindu du hilketa horrekin zerikusia duelakoan atxilotu zuten bigarren gizona, Efek jakinarazi duenez.
Fiskaltzak eta hildakoaren gurasoek egindako akusazio partikularrek bigarren gizon hori behin-behinean espetxeratzeko eskatu dute, eta kasua bideratzen ari den magistratuak eskaera hori hartu du.
Bigarren gizon hori, 26 urtekoa, behin-behineko espetxealdian dagoen 24 urteko beste gazte batekin elkartu da, gertakariak gertatu ziren egun berean Ertzaintzari bere burua entregatu zuenarekin, hain zuzen ere.
Egun hartan, 28 urteko emakume bat ere atxilotu zuten. Hilketaren lekutik gertu zegoen orain espetxeratu duten gizonarekin batera, eta behin-behineko askatasunean jarraitzen du gertakari horiengatik.
