"Hiriko gainerako auzoek dituzten eskubide eta zerbitzu berberak nahi ditugu"
Añorgako Atotxarrekako hainbat bizilagunek hauteskunde kanpainan parte hartu dute PPko alkategai Borja Corominasen bidez.
Añorgako Atotxarreka bidea eta auzunea. (Argazkia: Beñat Parra) 
Auzotarrek nabarmendu dutenez, “orain arte egindako eskaera eta jarduera guztiak bizilagunenak dira, edozein ideologia eta talde politiko alde batera utzita, eta inor gogaitzeko asmorik gabe”. Bigarren mailako hiritar sentitzen direla salatu dute: “Guk, gainerako herritarren antzera, gure zergak ordaintzen ditugu, eta eskatzen dugun gauza bakarra da hiriko gainerako auzoek dituzten eskubide eta zerbitzu berberak izatea, ez gehiago, ez gutxiago”.
Denbora daramate Atotxarrekako “gabeziak” seinalatzen eta irtenbideak eskatzen. “Auzoaren urbanizazioa 2009an bukatu zenetik, ez da mantentze lanik egin. Gaur egun, hemen bizi garen 300 familiek zikinkeria ikusten dugu egunero gure kaleetan. Txorkoek ez dute zuhaitzik, baina bai sastraka ugari. Landaredia espaloietan sartzen da, errepidearen lerroa desagertu egiten da, seinaleak falta dira, segurtasuneko hainbat puntu kritiko daude, eta ez dago inolako hornidurarik eta ekipamendurik”, azaldu dute.
Garraio publikoa
Atotxarrekako bizilagunen eskaera nagusietako bat garraio publikoa da. Ondorioz, ibilgailu pribatuak “etengabe” erabili behar dituztela diote. “Donostiak garraio publikoko sare ona du, eta, horregatik, gainerako donostiarren kalitate bereko autobus zerbitzua nahi dugu, arrazoizko maiztasuna duena, eta gutxienez erdiguneraino iristeko modukoa. Ez dugu beti autoaren zain egon nahi”, adierazi dute.
