Bi pertsona atxilotu dituzte gizon bat jipoitzeagatik
Ertzaintzako agenteek bi gizon atxilotu dituzte beste bati jipoi bat eman eta buruan hainbat lesio eragiteagatik, Donostiako Gros auzoko parke batean. Patruila batek ustezko egileak aurkitu zituen handik gutxira, eta atxilotu egin zituen. Segurtasun Sailak jakinarazi duenez, gertakaria igandean gertatu zen, 07:15ean.
Bi lekukok Ertzaintzari jakinarazi zioten bi gizonek beste bat lurrera bota eta buruan jo zutela. Beranduago, biktimak alde egin zuen, erasotzaileek bezala.
Polizia bertaratu eta lurrean odola zegoela egiaztatu zuten. Erasotzaileen deskribapena jaso ondoren, agenteak bi susmagarrien bila hasi ziren. Handik gutxira, patruila batek bi gizon aurkitu zituen, arropan odol arrastoak zituztenak, eta erasotzaileen deskribapenarekin bat zetozenak. Horrenbestez, identifikatu egin zituzten.
Biktima osasun zentro batean aurkitu zuten, eta bertan artatu zuten. Egiaztatu ahal izan zutenez, susmagarriek ordu batzuk lehenago eraso egin zioten pertsona horri, eta zauria egin zioten beso batean. Ertzainek bi susmagarriak atxilotu zituzten, lesio delitu bat egotzita.
Atxilotuak, 21 eta 35 urtekoak, ertzain etxera eraman zituzten beharrezko polizia eginbideak egiteko eta, ondoren, epailearen esku uzteko.
