Travellin Brothers izango da Musikagela jaialdiko protagonista
Emanaldiak Sagueseko Tomas Alba plazan izango dira larunbatean, hilaren 24an.
Bilboko Travellin Brothers taldea Mikel Azpiroz donostiarrarekin batera. Musikagela Musikagela jaialdia egingo dute larunbatean, hilaren 24an, Sagueseko Tomas Alba plazan, laugarren urtez. DKluba da antolatzailea eta sustatzailea, eta tokiko musika taldeen kontzertuek, urtero legez, izango dute pisu handiena egunean zehar. Jaialdia 12:00etan hasi eta arratsalde-gau partean amaituko da, 20:30ean. Eguraldi txarra eginez gero, jaialdia Intxaurrondoko kultur etxera eramango dute.
Jaialdi honetan, hiriko zortzi musika taldek parte hartuko dute Bilboko Travellin’Brothers banda ezagunarekin batera. 2015ean European Blues Challenge lehiaketa irabazi zuten, eta hemezortzi urteko ibilbidean hamar disko argitaratu dituzte eta 1.000 kontzertu baino gehiago eman dituzte. Hamabost herrialde baino gehiagotan birak egin ondoren, Coming Home hamargarren lana aurkeztu dute. Mikel Azpiroz musikari donostiarraren Mamusik estudioan nahastu eta masterizatu dute. Azpiroz bera ere arduratu da ekoizpenaz, eta taldearekin teklatua jo ohi du.
Jaialdiaren ordutegia bi zatitan banatuko da. Goizean, Convoi, 3zur, Monday Lup eta Ane Leux taldeak ariko dira zuzenean, 12:00etatik 14:00etara. Arratsaldean, berriz, Cosmicar, Muare, Tritones, Tony Montana & Pavlyunchenko eta Travellin Brothers banden txanda izango da, 18:00etatik 21:00etara. Kontzertuek ordu erdiko iraupena izango dute.
2018an hasi ziren Musikagela Festa antolatzen. Helburua da taldeei entsegu lokaletatik ateratzeko aukera eskaintzea eta beren lanak publikoaren aurrean aurkeztea, tokiko talentua erakusteko. Aurreko urtean, ezin izan zuten aurreikusita zegoen moduan egin jaialdia, euriarengatik. Azkenean, Intxaurrondo Kultur Etxean egin zuten eta publikoaren harrera ona jaso zuen.
Aurtengoari begira, oso gogotsu daude, eta espero dute eguraldiak errespetatzea, udari ongietorri paregabea emateko. Jaialdia beste ekitaldi batzuekin batera, kontzertu zirkuluaren barruan ospatzen da. Aurtengo edizioak, hilaren 21ean ospatuko den Musikaren Europako Eguneko ekitaldiekin bat egingo du.
