Realak Emma Ramirez eta Jacqueline Owusu fitxatu ditu
Jacqueline Owusuren aurkezpena, Anoetan. (Argazkia: Reala) Reala hurrengo denboraldiko taldea osatzen ari da, eta bi fitxaketa iragarri zituen ostiralean: Emma Ramirez eta Jacqueline Owusu. Emma Ramirez kataluniarra Realera bueltatuko da, duela bi denboraldi ere txuri urdina izan baitzen. Talderik gabe zegoen orain Ramirez, Bartzelonarekin zuen harremana eten ostean. Owusu, aldiz, duela urte batzuk Vila-realen aritu zen, baina azken denboraldia Israeleko Emek Hefer taldean egin du.
Ramirezek 2021-2022 denboraldian 26 partida jokatu zituen Realean, eta lau gol eta hiru asistentzia lortu zituen. Donostian oso maitatua izan zen, eta zaleak asko poztu dira kataluniarraren itzulerarekin. 21 urteko defentsa oso garrantzitsua izatea espero da, batez ere, klubak postu horretan izan dituen bajak kontuan hartuta. Bartzelonatik utzita aritu zen, eta 2022-2023 denboraldian oso gutxi jokatu zuen taldearekin, soilik zazpi partida jokatu baitzituen. Talde kataluniarrak egindako fitxaketen ondorioz, bere postua galdu zuen, eta jokalariak taldea uzteko erabakia hartu du.
Owusu Israeldik heldu da Realera. Azken bi denboraldietan, 32 gol sartu zituen Israelgo ligan. Aurrelari ghanatarra Vila-realen urtebete aritu ostean, Emek Hefer taldera joan zen. Talde israeldarrak bere sare sozialetan azaldu duenez, Realaren fitxaketa oso pozgarria da taldearentzat eta jokalariaren garapenerako “aurrerapausoa” dela dio taldeak.
Gaur hasi dituzte 2023-2024ko entrenamenduak, Zubietan. Natalia Arroyoren taldeak hainbat baja izan ostean, Lorena Navarro, Emma Ramirez, Jacqueline Owusu eta bigarren taldetik igo diren Nahia Aparicio eta Elene Viles izango dira jokalari berriak. Denboraldiaurrean hainbat partida jokatu dituzte, eta oraindik egutegia iragarri ez duten arren, ligaren hasiera irailaren 9an izatea aurreikusten dute.
Bestalde, larunbatean Anoetan egindako entrenamenduan datorren denboraldiko kamiseta berriak aurkeztu zituzten. Ordura arte, soilik lehenengo kamiseta eskuragarri zegoen dendan, baina gaurtik aurrera, bigarrena eta hirugarrena ere salgai egongo dira. Lehenengoa, urteroko legez, txuri-urdina izango da; bigarrena, urdina; eta, hirugarrena, berriz, zuria. Jarraian, kamiseta berrien aurkezpen bideoa:
👕 𝗡𝘂𝗲𝘀𝘁𝗿𝗮 𝗽𝗶𝗲𝗹#WeareReal | #AurreraReala pic.twitter.com/6zZRwdtmJG
— Real Sociedad Fútbol (@RealSociedad) July 15, 2023
