Alex Barcello fitxatu du Gipuzkoa Basketek
Alex Barcello, partida batean. 
Gipuzkoa Basketek Alex Barcello eskolta (Arizona, AEB, 1998) fitxatu du 2023-2024ko denboraldirako. BNXT League ligatik dator Barcello, Belgikako eta Herbehereetako lehenengo mailatik, azken denboraldian 23 neurketa jokatuta. Batez beste, zazpi puntu sartu ditu partida bakoitzean, hirukoen %47 sartuta eta jaurtiketa libreen %97. Basketball Champions League Europako hirugarren txapelketa garrantzitsuena ere jokatu du, eta Greziako lehenengo mailan eta AEBetako NCAA txapelketan ere aritutakoa da Barcello.
“Alex fitxatuta, Gipuzkoa Basketek hiruko jaurtitzaile handi bat fitxatu du, bere jaurtiketa propioak sor ditzakeena, eta taldea antolatu eta jokarazi dezakeena. Jokalariak beste talde batzuen eskaintzak zituen, eta Gipuzkoa Basketera etortzea erabaki du, klubak denboraldi honetarako duen kirol proiektuari balioa emanez”, nabarmendu du klub donostiarrak.
Barcellorena Gipuzkoa Basketen laugarren fitxaketa da, Manex Ansorregi, Ivan Aurrekoetxea eta Josip Vrankic fitxatu baititu aurretik. Horrela, bederatzi jokalari ditu dagoeneko taldeak hurrengo denboraldirako: Xabi Oroz, Aitor Zubizarreta, Mikel Motos, Ander Martinez, Manex Ansorregi, Mike Carlson, Ivan Aurrekoetxea, Josip Vrankic eta Alex Barcello. Klubak azaldu duenez, taldea osatzen bukatzeko lanean dihardute.
