Adin guztietarako jolas parkea jarri dute Grosen arratsaldean
Arku tiroa izan da bertaratu direnek probatu ahal izan duten jolasetako bat. (Argazkia: Aitor Odriozola Zubillaga) Udalaren Aste Nagusiko egitarauak adin guztietarako jolas parkea prestatu du gaur arratsaldean (hilak 18) Groseko Katalunia plazan. Hala, egun hauetan zehar umeen gozagarri egon diren puzgarriei beste hainbat jolas batu zaizkie plazaren beste aldean: arku tiroa, saskibaloia, futbolina…
Eskrimarekin lehen kontaktua izateko aukera ere egon da, Fortunaren eskutik. Hasieran, kirolaren nondik norakoak azaldu dituzte, eta gero nahi zuen orok izan du zenbait minutuz kirol hori probatzeko aukera, jantzi eta guzti. Beste proba batzuetan ere, arku tiroan, esaterako, azalpen txiki bat ematen zuten begiraleek, jaurtiketa ahalik eta egokien egin ahal izateko.
Beroak ez du askorik lagundu jendea bertaratzen, baina denborak aurrera egin ahala gero eta lagun gehiago elkartu da. Dena den, ez dira ilara luzeak sortu, eta jendeak ez du askorik itxaron behar izan jolasetan parte hartzeko. Jarraian arratsaldean zehar ateratako irudi batzuk:
