Sentsazioak puntu bihurtzeko garaia
Brais Mendez Realeko jokalaria, asteazkenean, goleko jaurtiketa egiten. (Argazkia: Reala) Gizonezkoen Realak igandean jokatuko du ligari dagokio seigarren jardunaldia, asteazkenean Txapeldunen Ligako partida jokatu ondoren. Getafe hartuko du etxean, 14:00etan. Imanol Alguacilek zuzentzen duen taldea ondo ari da jokatzen azken partidetan —Inter Milan eta Real Madril baino hobea izan da haien aurka jokaturiko neurketetan—, baina ate aurrean eraginkortasuna faltatzen ari zaio, eta ez du lortzen nagusitasun hori markagailuan islatzea.
Emakumezkoen Realak atsedena izango du, selekzioen partidak baitaude. Hori baliatuz, asteon jarduera ezberdin bat egin dute jokalariek: Kontxako txapeldunekin arraunean aritu dira.
Saskibaloian, Ibaeta Basketek larunbatean ekingo dio ligari, sentsazio onekin ekin ere. Gaska kiroldegian lehiatuko dira Bembibreren aurka, 18:00etan. Gipuzkoa Basketek ere bihar jokatuko du. Euskal Kopako finalean arituko da Bergaran, 20:00etatik aurrera. Gaur ezagutuko du aurkaria: Iraurgi eta Zornotzaren arteko norgehiagokako garailea izango da.
Eskubaloiari dagokionez, Bera Berak asteazkenean jokatu zuen Malagaren etxean, eta 26-21 galdu zuen. Asteburuan jai izango dute, baina asteartean jokatuko dute hurrengo partida: Xixonen zelaian arituko dira, 19:00etan.
Izotz hockeyan asteburu honetan hasiko da denboraldia, eta Txuri Urdineko bi taldeek etxetik kanpo hasiko dute liga. Gizonezkoek larunbatean jokatuko dute, 22:00etan, Portoren aurka; emakumezkoek, berriz, igandean, 14:30ean, Valdemororen etxean.
Amaitzeko, belar hockeyan ligako bigarren jardunaldia izango dute Realeko jokalariek igandean, 11:00etan, Club de Camporen etxean. Estreinako partida 1-3 galdu zuten Poloren aurka.
Futbola
Gizonezkoen liga, 6. jardunaldia
- Reala – Getafe (igandea, 24, 14:00).
Saskibaloia
Emakumezkoan liga, 1. jardunaldia
- Ibaeta Basket – Bembibre (larunbata, 23, 18:00).
Gizonezkoak, Euskal Kopako finala
- Gipuzkoa Basket – Iraurgi/Zornotza (larunbata, 23, 20:00).
Izotz hockeya
Gizonezkoen liga, 1. jardunaldia
- Porto – Txuri Urdin (larunbata, 23, 22:00).
Emakumezkoen liga, 1. jardunaldia
- Valdemoro – Txuri Urdin (igandea, 24, 14:30).
Belar hockeya
Emakumezkoen liga, 2. jardunaldia
- Club de Campo – Reala (igandea, 24, 11:00).
