Proiektu argentinarren ordezkariek elkarretaratzea egin dute Zinemaldian, «mehatxu ultraeskuindarren aurrean etorkizuna ziurtatzeko»
Argentinako proiektuen ordezkariak Zinemaldian, mehatxu ultraeskuindarren aurkako elkarretaratzean. (Argazkia: Zinemaldia) 
Zinemaldian dauden 25 film eta proiektu argentinarren ordezkariek, gehienak Zinema Argentinar Batua kontsignako Ikus-entzunezko Batzar Irekian (industriaren sektore guztiak ordezkatzen ditu) parte hartzen dutenak, elkarretaratzea egin zuten atzo Kursaalean, alderdi ultraeskuindar bateko presidentegaiak Argentinako Zinema eta Ikus-entzunezko Arteen Institutu Nazionala ixteko mehatxua egin duela salatzeko eta euren “kezka” adierazteko.
Ordezkariek ohar baten bidez azaldu dutenez, Argentinak “parte hartze errekorra” izango du aurten Zinemaldian, “gure talde tekniko eta artistikoen lanari eta talentuari esker eta gure industria sustatzen duen politika zinematografikoaren jarraipenari esker”.
Adierazi dute ikus-entzunezkoen kultura industria argentinarra “sortzailea eta erresilientea” dela, nahiz eta testuinguru ekonomiko kaltegarria izan. “Ekonomiaren sustatzaile gisa nabarmentzen” dela azaldu dute, “zuzeneko eta zeharkako lana” sortuz lotutako zerbitzu askotan, azken hamabost urteetan enpleguaren hazkunde iraunkorra %45 izanik. “Ikus-entzunezko industriaren eragin ekonomikoa Argentinako ekonomia osoaren %5,2koa da, beste sektore batzuetan zuzeneko eta zeharkako eraginak batuz”, nabarmendu dute.
Beraien iritziz, “sustapen politikak hobetzea, indartzea eta eraginkorrago bihurtzea” da jarraitu beharreko bidea, “industria indartsu eta finkatuaren existentzia desaktibatu gabe”. Argentinak bere iruditeria kolektibo propioa izateko “eskubidea eta betebeharra” duela uste dute, bere memoria, nortasuna eta ohiturak islatzeko. “Argentinako zinemak leku hori izaten jakin du, eta hala izaten jarraituko du”, nabarmendu dute.
