Emakumezko errealizadoreen lana nabarmenduko dute 'Euskal Emakume Zinemagileak' zikloan
Urritik abendura egingo dute Euskal Emakume Zinemagileak zikloa. 
Euskadiko Filmategiak Euskal Emakume Zinemagileak zikloaren hirugarren edizioarekin hasiko du ikasturtea, eta hamar film proiektatuko ditu Donostian urria eta abendua bitartean. 1970eko hamarkadaren hasieran jaiotako emakumeek egindako euskal zinemaren historian barrena eginiko errepasoaren helburua zuzendari horien talentua eta lanak nabarmentzea da. Egileek beraiek aurkeztuko dituzte beren lanak ia emanaldi guztietan.
Zinemaldian estreinatu zen Arnasa betean (2023) lanak emango dio hasiera programazioari (urriak 6, Tabakalera, 19:00). Bertha Gaztelumendi eta Rosa Zufiak zuzendutako dokumentalak emakumeek egindako zinemaren iraganari eta orainari buruzko ikuspegi panoramikoa eskaintzen du. El sueño de la sultana (2023), Isabel Hergueraren lehen film luzea, Donostia Zinemaldiaren 71. edizioko Sail Ofizialean lehiatu dena, ere eskainiko dute (urriak 20, Tabakalera, 19:00).
Era berean, Matrioskas. Las niñas de la guerra (Helena Bengoetxea, 2021) filmak gerrako ume izan ziren emakume batzuen erretratu humano eta bizitzaz beterikoa erakutsiko du (urriak 27, Tabakalera, 19:00). Bestalde, Estela Ilarraz Madrilen bizitza hobe baten bila dabiltzan ekuadortarrarengana hurbilduko da Proxima estación (2007) lanean (azaroak 3, Tabakalera, 19:00). Horretaz gain, Jone Karresek begirada berdintasunaren aldeko borrokan jartzea proposatuko du Hondarribia eta Irungo festak hizpide dituen Alardearen seme-alabak (Eneko Olasagastirekin batera zuzendua) lanean (azaroak 10, Tabakalera, 19:00).
My Way Out-ek (Izaskun Arandia, 2022) Londresera eramango du ikuslea dokumentalari izena ematen dion aretoaren 30. urteurrena ospatzeko. Lokal hartan, hain zuzen, hiriko trans komunitateak babestu eta askatasunez adierazteko aukera izan zuen (azaroak 24, Tabakalera, 19:00). Iurre Telleria eta Enara Goikoetxea Comète sareak Bigarren Mundu Gerran egindako lanera hurbilduko dira Azken bidaia (2011) luzean (abenduak 1, Tabakalera, 19:00). Eta Pelota II (2015) filmean, Olatz Gonzalez de Abrisketa zinemagile eta antropologoak (Jørgen Leth danimarkarrarekin batera) pilota partidetako materialaren aukeraketan jarriko du arreta (abenduak 8, Tabakalera, 19:00).
Azkenik, Euskal Emakume Zinemagileak III zikloari amaiera emateko, Irrintziaren oihartzunak (Iratxe Fresneda, 2016) filma eskainiko da. Lanak Mirentxu Loiarte, euskal zinemaren aitzindarietako bat, aldarrikatzea du helburu (abenduak 15, Tabakalera, 19:00). Bestalde, Leire Apellanizek udako zinemetako azken abenturazaleetako bati buruz hitz egingo du El último verano (2016) filmean (abenduak 22, Tabakalera, 19:00).
