Astronomia gertutik bizitzeko aukera eskaintzen du Tabakalerako erakusketa berriak
Ilargiaren gainazala. (Argazkia: Tabakalera) 
Eguzki sistemako planetak hatzez ukitzeko, Ilargiaren gainazala nolakoa den jakiteko edo Eguzkia oso gertu sentitzeko aukera ematen du Tabakaleran jarri duten STROM – Astronomia inklusiboa erakusketak. Erakusketa hau Passion for Knowledge jaialdirako ekoitzi du DIPCk Tabakalerarekin elkarlanean, eta zabalik egongo da urriaren 4tik 31ra arte, Tabakalerako hirugarren solairuan.
Esperientzia interaktibo eta multisentsorialen bidez, bertaratzen direnek astronomiako funtsezko kontzeptuak ulertu ahal izango dituzte, eta Euskal Herrian astrofisikaren eremuan egiten den ikerketaren berri izango dute.
Erakusketaren funtsezko helburuetako bat da desgaitasunak dauzkaten pertsonen sarrera bermatzea, bereziki ikusmen eta entzumen arazoak dituztenena eta mugikortasun murriztua dutenena. Horretarako, behatzetarako gidak instalatu dira zoruan, hatzen bidezko informazioa jasotzeko panelak testu tamaina egokiekin, auto-gidetarako sarbideak eskaintzen dituzten QR-ak, ikus-entzunezkoak zeinu bidezko gidekin, azpitituluak eta begizta magnetikoa, dena oztopo fisikorik gabeko gunean.
Erakusketarekin lotutako hitzaldiak
Erakusketarekin batera, hitzaldi sorta bat prestatu dute, publiko guztietara zuzendua. Lehenengo hitzaldia gaur (urriak 4) izango da, 19:00etan. Astronomiari buruzko hartu-eman inklusiborantz: planeten eraketa esploratzeko kit multisentsoriala izenburupean, Amelia Bayo doktoreak emango du (Project Scientist European Southern Observatory). Txileko Planeta Prestakuntzako Milurteko Nukleoa sortu eta zuzendu zuen urteetan, Amelia Bayok eta bere taldeak astronomiaren irakaskuntza inklusiboa errazteko kit bat sortu zuten. Kit hau planetak sortzeko prozesuetan zentratzen da, 3Dn inprimatutako eredu baten bidez. Eredu horrek sekuentzialki eboluzionatzen du, esperientzia dinamiko bat eskainiz. Solasaldi honetan, planetak modu ludiko, hurbil, zorrotz eta irisgarrian nola sortzen diren ezagutuko dute.
Bihar, urriaren 5ean, 11:00etan, Ines Rodriguez Hidalgo doktoreak, Valladolideko Museoko Zuzendariak, O’ Sole mio. Zure bizitzako izarra ezagutzeko musika-gonbidapena hitzaldia emango du: Eguzkia izar “arrunta” da, baina benetako “film-izarra” ere bai, liluragarria eta beharrezkoa, eta harekin bizi gara. Mota guztietako gaitasunak dituzten pertsonei zuzendutako hitzaldi hau gure bizitzako izarra ezagutzeko gonbidapen musikala da, irudi eta bideo ikusgarrien bidez, eta eguzkiaz hitz egiten duten abestien bidez.
Urriaren 18an, 19:00etan, Amelia Ortiz Gil doktoreak, Valentziako Behatoki Astronomikokoak, Unibertsoaren zentzumen-esplorazioa hitzaldia eskainiko du: Unibertsoaz dugun pertzepzioa bisuala izatera ohituta gauden arren, Kosmosa belarriaren, ukimenaren, usaimenaren eta dastamenaren bidez hautemateko beste modu batzuk ezagutuko dituzte solasaldi honetan. Paradigma-aldaketa horri esker, dibertsitate funtzionala duten pertsonek ere parte hartu dezakete.
Eta bukatzeko, urriaren 27an, 19:00etan, Raul Angulo doktoreak, Patricia Cancelo margolariak, Juan Jose Gomez Cadenas doktoreak Amaraun kosmikotik partikula mamura: gure Unibertsoaren inguruko hausnarketa artetik eta zientziatik hitzaldia emango dute: Nola hurbil gaitezke unibertso ezagunaren mugak ulertzera? Eta nola hitz egin eta osatu daitezke artea eta zientzia? DIPCko mahai-inguru zientifiko honetan unibertsoa eta bere lege fisikoak lurpeko esperimentuen eta superordenagailuen simulazioen bidez nola azter daitezkeen azalduko dira, euren esperientziak Patricia Cancelo margolariaren prozesu artistikoarekin kontrastatuz.
