Aurkari gogorra bisitatuko du Realak
(Argazkia: Reala) 
Realak garaipenaren bidea berreskuratu zuen joan den asteburuan Vila-reali irabazita, eta hortik jarraitu nahi dute Natalia Arroyoren neskek gaurkoan. Ordea, ez da partida erraza izango, Real Madrilen etxean jokatuko baitute, ligako bigarrenaren etxean. Hala ere, dena ematen badute, edozertarako gai direla erakutsi dute behin baino gehiagotan txuri-urdinek.
Mutilei dagokienez, Txapeldunen Ligako final-zortzirenetako txartel historikoa lortu ostean, ez dute burbuila hautsi nahi, eta irabaztera doaz bihar Almeriara. Partida erraza izan beharko luke, Imanol Aguacilen taldearentzat, ligako azkena baita talde andaluziarra.
Saskibaloian, Gipuzkoa Basketek Alacanten aurka jokatuko du Herrialde Katalanetan gaur iluntzean. Azken bost partidak irabazita, bolada ezin hobean murgilduta daude donostiarrak, eta ez dute hortik atera nahi, sailkapeneko goiko postuetan sendo jarraitzeko.
Ibaeta Basketi dagokionez ez du asteburuan jokatuko, hurrengo ostegunean baizik, Estudiantesen aurka, etxean. Talde sendoa da Estudiantes, baina donostiarrak euren gainetik daude sailkapenean, eta zaleen babesa izango dute, garaipenaren bila joateko.
Izotz hockeyan, Txuri Urdineko neskek ez dute partidarik jokatuko aste honetan, baina mutilek bai. Jaca izango dute bisitari, ligako liderra, baina zaleen babesa izango dute etxekoek. Aragoitarretik oso urrun ere ez daude donostiarrak —hirugarrenak dira—, beraz, mahai gainean kolpe sendo bat emateko aukera dute.
Azkenik, belar hockeyan, Realak Taburineteren aurka jokatuko du etxean, ligako azken-aurrenaren aurka. Azken bi partidak galdu ostean, garaipenaren bidea berreskuratu nahi dute donostiarrek, sailkapenean behera ez egiteko.
PARTIDAK
Futbola
Emakumezkoen liga, 8. jardunaldia
- Real Madril — Reala (ostirala, 10, 20:00)
Gizonezkoen liga, 13. jardunaldia
- Almeria — Reala (larunbata, 11, 16:15)
Saskibaloia
Gizonezkoen bigarren maila, 7. jardunaldia
- Alacant — Gipuzkoa Basket (ostirala, 10, 20:45)
Emakumezkoen liga, 7. jardunaldia
- Ibaeta Basket — Estudiantes (osteguna, 16, 19:30)
Izotz hockeya
Gizonezkoen liga, 8. jardunaldia
- Txuri Urdin — Jaca (larunbata, 11, 21:00)
Belar hockeya
Emakumezkoen liga, 10. jardunaldia
- Reala — Taburinete (igandea, 12, 11:00)
