Europa du jokoan Bera Berak
Bera Beraren eta Solaren arteko joaneko partidaren une bat. (Argazkia: Bera Bera) 
Hil ala biziko neurketa dauka igandean Bera Berak etxean, Sola norvegiarraren aurka. Hain zuzen ere, Europa Ligako Q3 kanporaketako joanekoan zazpi punturengatik galdu zuten donostiarrek, eta alde horri buelta eman beharko diote itzulerakoan, multzoen faserako sailkapena eskuratu nahi badute. Euren zaleen babesa izango dute horretarako, eta dena ematera aterako dira Imanol Alvarezen neskak.
Futbolean, Sevilla hartuko du larunbatean etxean Realak, Real Madrilen etxean jasotako zigor gogorrari (7-1) buelta emateko helburuarekin. Ligako hamabigarren postuan daude andaluziarrak eta hamargarrenean donostiarrak, beraz, aurkari zuzenak izanda, garrantzitsua izango da hiru puntuak batzea. Horretarako, zaleen babesa izango dute Natalia Arroyoren neskek.
Saskibaloian, atzo Estudiantesen aurka galdu ostean, Ibaeta Basketek erreakzionatzeko denbora gutxi izango du, Jairis jasoko baitu larunbatean etxean. Ligako zazpigarren postuan daude donostiarrak eta hamargarrenean murtziarrak, beraz, puntuak batzeko aukera on bat da Ibaeta Basketentzat. Bestalde, Gipuzkoa Basketek etxean jokatuko du igandean, Caceresen aurka; ligak seigarren postuak daude donostiarrak, eta hamargarrenean Extremadurakoak.
Belar hockeyan, Tenis Santander bisitatuko du Realak larunbatean, eta puntuak batzeko aukera on bat izango da, Taburineteren aurka joan den astean hartutako garaipenaren bidetik jarraitzeko.
Azkenik, izotz hockeyan, Txuri Urdineko neskek Puigcerdaren etxean jokatuko dute igandean. Neurketa garrantzitsua izango da, ligako liderrak baitira donostiarrak, eta bigarren sailkatua izango dute aurkari.
PARTIDAK
Eskubaloia
Emakumezkoen Europa liga, Q3 kanporaketako itzulerako partida
- Bera Bera — Sola (igandea, 19, 12:00)
Futbola
Emakumezkoen liga, 9. jardunaldia
- Reala — Sevilla (larunbata, 18, 16:00).
Saskibaloia
Emakumezkoen liga, 8. jardunaldia
- Ibaeta Basket — Jairis (larunbata, 18, 18:00)
Gizonezkoen bigarren mailako liga, 8. jardunaldia
- Gipuzkoa Basket — Caceres (igandea, 19, 17:00)
Belar hockeya
Emakumezkoen liga, 11. jardunaldia
- Tenis Santander — Reala (larunbata, 18, 17:00)
Izotz hockeya
Emakumezkoen liga, 8. jardunaldia
- Puigcerda — Txuri Urdin (igandea, 19, 13:30)
