Donostiako Txistulari Taldeak eta Santa Zezilia Abesbatzak kontzertua eskainiko dute bihar udaletxean
Santa Zezilia eguna hilaren 22an, asteartea, ospatzen den arren, musikarien zaindariaren ohiko kontzertua igandean izan ohi da, eguneko pregoi gisa. Hala, Donostiako Txistulari Taldeak eta Santa Cecilia Abesbatzak Santa Zezilia musikarien zaindariaren omenezko kontzertua eskainiko dute bihar eguerdian, Donostiako Udaletxeko Osoko Bilkuren aretoan. Aurreko urteetan egin den moduan, oraingoan ere sarrera librea izango du ekitaldiak edukiera bete arte.
Musika saioan, Txistulari Bandak eta Santa Cecilia Abesbatzak banaka zein elkarrekin joko dute. Egitaraua txistulariekin hasiko da, Bonifazio Laskuraingo musikarien zaindariari eskainitako kalejira bat interpretatuz. Ondoren, Alejandro Olazaran eta Aita Hilarioren hiru obra eskainiko dituzte: Hainbat dantza doinu, Txoriak eta Harkaitzetan.
Abesbatzak jarraituko du ostean koruko errepertorioarekin. Laida Otaduy zuzendariaren gidaritzapean, Alexandre Lesbordesen Ama, Aita Donostiaren Jeiki, Yon Oñatibiaren Aunitz urtez, Xabier Sarasolaren Ene maitea, Jesus Guridiren Aldapeko eta Urretxindor banintz izango dira, besteak beste, bihar eskainiko dituzten abestiak. Ohi denez, halaber kontzertuaren hirugarren zatia ahotsez eta txistuz tartetatutako piezek osatuko dute.
