Irabazita ere, Europatik kanpo gelditu da Bera Bera
Bera Beraren eta Solaren itzulerako partidako une bat. (Argazkia: Bera Bera) 
Europa Ligako multzoen fasea jokatzea zuen jokoan igandean Bera Berak, baina partida bikaina eginda eta irabazita ere, lehiaketatik kanpo gelditu dira, gutxigatik. Hain zuzen ere, zazpi golengatik galdu zuten Sola talde norvegiarraren aurkako joanekoan, eta seirengatik irabazi zuten atzo: 34-28. Karstenek eta Boadak kanporaketa berdintzeko aukera argiak izan zituzten neurketaren azken uneetan, baina ez zuten asmatu, eta norvegiarrek lortu zuten sailkapena.
Futbolean, Realak galdu egin zuen larunbatean Zubietan Sevillaren aurka jokatutako neurketan: 1-2. Bigarren porrota jarraian da Natalia Arroyoren taldearentzat, eta azkar eman beharko diote buelta egoerari, sailkapenean behera egiten jarraitu nahi ez badute. Beste aurkari zuzen baten aurka jokatuko dute asteburuan, Valentziaren aurka, eta garrantzitsua izango litzateke irabaztea.
Saskibaloian, Ibaeta Basketek garaipena eskuratu zuen larunbatean Jairisen aurka: 74-64. Donostiarrak nagusi izan ziren partidan, eta ligako seigarren postuan daude orain. Gipuzkoa Basketi dagokionez, nagusitasunez irabazi zion atzo Caceresi (88-64), eta ligako bosgarren postuan daude orain.
Belar hockeyan, ez zuten egun ona izan larunbatean txuri-urdinek, 3-0 galdu baitzuten Tenis Santanderren aurka. Horrela, porrot batekin eta seigarren postuan itxi du Realak ligako lehenengo itzulia, eta martxoan hasiko da bigarren itzulia.
Izotz hockeyan, Puigcerdaren etxean jokatu zuten igandean Txuri Urdineko neskek, eta 2-4 irabazi zuten (2-0, 0-1 eta 0-3). Horrela, ligako lidergoan sendo jarraitzen dute donostiarrek, hogei punturekin eta bigarrenari zortzi puntu aterata.
PARTIDAK
Eskubaloia
Emakumezkoen Europa Liga, Q3 kanporaketako itzulerako partida
- Bera Bera 34 — Sola 28 (Europa Ligatik kanpo gelditu da Bera Bera, joanekoan 39-32 galdu baitzuen)
Futbola
Emakumezkoen liga, 9. jardunaldia
- Reala 1 — Sevilla 2
Saskibaloia
Emakumezkoen liga, 8. jardunaldia
- Ibaeta Basket 74 — Jairis 64
Gizonezkoen bigarren mailako liga, 8. jardunaldia
- Gipuzkoa Basket 88 — Caceres 64
Belar hockeya
Emakumezkoen liga, 11. jardunaldia
- Tenis Santander 3 — Reala 0
Izotz hockeya
Emakumezkoen liga, 8. jardunaldia
- Puigcerda 2 — Txuri Urdin 4
